ന്യൂഡൽഹി : ക്ലബ്ഹൗസ് ചാറ്റ് ആപ്പിൽ മുസ്ലീം സ്ത്രീകൾക്കെതിരെ പരാമർശങ്ങൾ നടത്തുന്നവർക്കെതിരെ നടപടിയെടുക്കണമെന്ന് ആവശ്യപ്പെട്ട് ഡൽഹി വനിതാ കമ്മീഷൻ പോലീസിന് നോട്ടീസ് അയച്ചു.
“മുസ്ലിം പെൺകുട്ടികൾ ഹിന്ദു പെൺകുട്ടികളേക്കാൾ സുന്ദരികളാണ്” എന്ന വിഷയത്തിൽ മോശമായി സംസാരിച്ചവർക്കെതിരെ എഫ്ഐആർ രജിസ്റ്റർ ചെയ്യാൻ ഡൽഹി പോലീസിന്റെ സൈബർ ക്രൈം സെല്ലിനോട് ആവശ്യപ്പെട്ടതായി ഡിസിഡബ്ല്യു പ്രസ്താവനയിൽ പറഞ്ഞു.പ്രതികളെ ഉടൻ അറസ്റ്റ് ചെയ്യാനും സ്വീകരിച്ച നടപടിയെ കുറിച്ച് വിശദമായ റിപ്പോർട്ട് 5 ദിവസത്തിനകം സമർപ്പിക്കാനും കമ്മീഷൻ ഡൽഹി പോലീസിനോട് ആവശ്യപ്പെട്ടു.
മുസ്ലീം സ്ത്രീകളെയും പെൺകുട്ടികളെയും കുറിച്ചുള്ള ഓഡിയോ സംഭാഷണം ആരോ തന്നെ ട്വിറ്ററിൽ ടാഗ് ചെയ്തതായി ഡിസിഡബ്ല്യു ചെയർപേഴ്സൺ സ്വാതി മലിവാൾ പറഞ്ഞു. കുറ്റക്കാർക്കെതിരെ ശക്തമായ നടപടി സ്വീകരിക്കേണ്ടതുണ്ട്, അതുകൊണ്ടാണ് വിഷയത്തിൽ ഉടൻ എഫ്ഐആറും അറസ്റ്റും ആവശ്യപ്പെട്ട് ഡൽഹി പോലീസിന് നോട്ടീസ് നൽകിയത്, പ്രസ്താവനയിൽ വനിതാ കമ്മീഷൻ പറയുന്നു.
