കൊല്ലം: കൊട്ടാരക്കരയിൽ യുവാക്കൾ നടത്തിയ ബൈക്ക് റെയ്സിങ്ങിനിടെ അപകടം. എതിരെ സഞ്ചരിച്ച വിദ്യാർത്ഥിക്ക് ഗുരുതരമായി പരിക്കേറ്റു. അമിത വേഗതയിൽ പാഞ്ഞ ബൈക്കിൽ നിന്നും സെൽഫി എടുക്കാനുള്ള ശ്രമത്തിനിടെയാണ് അപകടമുണ്ടായത്. പൊലിക്കോട് വെച്ച് രാവിലെ 11.30 ഓടെയാണ് സംഭവം.
തിരുവനന്തപുരം ഭാഗത്ത് നിന്ന് കൊട്ടാരക്കര ഭാഗത്തേയ്ക്കാണ് ഇവർ മത്സരയോട്ടം നടത്തിയിരുന്നത്. എതിർ ദിശയിൽ നിന്നും വന്ന ബൈക്ക് യാത്രികനായ അശ്വന്ത് കൃഷ്ണൻ എന്ന എംബിഎ വിദ്യാർത്ഥിക്കാണ് ഗുരുതരമായി പരിക്കേറ്റത്. നാല് ന്യൂജെൻ ബൈക്കുകളിലായിട്ടാണ് യുവാക്കൾ ബൈക്ക് റെയ്സിങ് നടത്തിയത്. ഒരാൾ അപകടത്തിൽപ്പെട്ടതിനെ തുടർന്ന് മറ്റുള്ളവർ രക്ഷപെടുകയായിരുന്നു.
ഇവർ സഞ്ചരിച്ചത് നമ്പർ പ്ലേറ്റില്ലാത്ത നാലു ബൈക്കുകളിലാണ്. നാല് ബൈക്കുകളും ഒറ്റ ഫ്രൈമിൽ കിട്ടുന്നതിനായി ഏറ്റവും മുൻപിലായി പോയ ബൈക്കിലെ ആൾ അമിത വേഗതയിൽ പോയിക്കൊണ്ടിരിക്കുമ്പോൾ സെൽഫി എടുക്കാൻ ശ്രമിക്കുകയായിരുന്നു. അപകട ശേഷം ഒളിപ്പിക്കാൻ ശ്രമിച്ച ഒരു ബൈക്ക് പോലീസ് പിടിച്ചെടുത്തിട്ടുണ്ട്. മറ്റു ബൈക്കുകൾക്കായി അന്വേഷണം തുടരുകയാണ്.
സെൽഫി എടുക്കാനുള്ള ശ്രമത്തിനിടെ ബൈക്ക് നിയന്ത്രണം വിട്ട് എതിർ ദിശയിൽ ബുള്ളറ്റിൽ യാത്ര ചെയ്യുകയായിരുന്ന വിദ്യാർത്ഥിയെ ചെന്നിടിച്ചു. സെൽഫി എടുക്കാൻ ശ്രമിച്ച ആളുടെ പരിക്ക് ഗുരുതരമല്ല. എന്നാൽ വാഹനം പൂർണ്ണമായും തകർന്നിട്ടുണ്ട്. ബുള്ളറ്റ് മറ്റൊരു കാറിൽ ഇടിച്ചിട്ടുണ്ട്. ആയൂർ ഭാഗത്ത് വെച്ച് പോലീസ് നിർത്താൻ ആവശ്യപ്പെട്ടിട്ടും നിർത്താതെ പോയവരാണ് അപകടം വരുത്തിയത്.
