ന്യൂഡൽഹി : ഷൂസുകളിലും , മഗ്ഗുകളിലും , ടീ ഷർട്ടുകളിലും ദേശീയ ചിഹ്നങ്ങൾ പതിപ്പിച്ച ആമസോണിനെതിരെ എഫ്ഐആർ രജിസ്റ്റർ ചെയ്ത് പോലീസ് . വിഷയത്തിൽ കമ്പനിക്ക് നോട്ടീസ് അയച്ചതായി ഭോപ്പാൽ പോലീസ് കമ്മീഷണർ മക്രന്ദ് ദ്യൂസ്കർ പറഞ്ഞു.
കമ്പനിക്കും ഉദ്യോഗസ്ഥർക്കും എതിരെ എഫ്ഐആർ ഫയൽ ചെയ്യാൻ മധ്യപ്രദേശിലെ ആഭ്യന്തര മന്ത്രി ഡോ. നരോത്തം മിശ്ര പോലീസിനോട് നിർദ്ദേശിച്ചതിനെ തുടർന്നാണ് നടപടി . “ഓൺലൈൻ ഇ-കൊമേഴ്സ് പ്ലാറ്റ്ഫോമായ ആമസോൺ വിൽക്കുന്ന ഉൽപ്പന്നങ്ങളിൽ നമ്മുടെ ദേശീയ പതാക ഉപയോഗിക്കുന്നതായി ശ്രദ്ധയിൽപ്പെട്ടിട്ടുണ്ട്. ദേശീയ പതാക പോലും ഷൂസിൽ ഉപയോഗിച്ചത് അസഹനീയമാണ് “ – നരോത്തം മിശ്ര പറഞ്ഞു.
ഇന്ത്യൻ ദേശീയ പതാകയെ അപമാനിച്ച ആമസോണിനെതിരെ കർശന നടപടിയെടുക്കണമെന്ന് ആവശ്യപ്പെട്ട് കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്സ് ആഭ്യന്തര മന്ത്രി അമിത് ഷായ്ക്ക് കത്തയച്ചിരുന്നു .
ഇന്ത്യയുടെ ഫ്ളാഗ് കോഡ് പ്രകാരം, ഉപയോഗത്തിന് ശേഷം വലിച്ചെറിയാവുന്ന ഏതെങ്കിലും ഉൽപ്പന്നത്തിൽ ദേശീയ പതാക അച്ചടിക്കാൻ ആർക്കും അവകാശമില്ല. വിഷയത്തിൽ കമ്പനിക്കെതിരെ നിയമപ്രകാരം നടപടിയെടുക്കണം . ആമസോൺ ഇത്തരമൊരു കാര്യം ചെയ്യുന്നത് ഇതാദ്യമല്ലെന്നും സിഎഐടി സെക്രട്ടറി ജനറൽ പ്രവീൺ ഖണ്ഡേൽവാൾ പറയുന്നു . “ഏകദേശം മൂന്ന് വർഷം മുമ്പ്, ആമസോൺ സമാനമായ രീതികളിൽ ഏർപ്പെട്ടിരുന്നു. ആ സമയത്ത്, അന്നത്തെ വിദേശകാര്യ മന്ത്രിയായിരുന്ന സുഷമ സ്വരാജ് ഉൽപ്പന്നങ്ങൾ നീക്കം ചെയ്ത് കമ്പനിക്ക് മുന്നറിയിപ്പ് നൽകിയിരുന്നതായും അദ്ദേഹം വ്യക്തമാക്കി.
ഛത്തീസ്ഗഡ് ചേംബർ ഓഫ് കൊമേഴ്സ് നൽകിയ പരാതിയുടെ അടിസ്ഥാനത്തിൽ ആമസോണിനെതിരെ ഛത്തീസ്ഗഡ് പോലീസും എഫ്ഐആർ രജിസ്റ്റർ ചെയ്തിട്ടുണ്ട്. ആമസോൺ ദേശീയ പതാക അച്ചടിച്ച ഉൽപ്പന്നങ്ങൾ വിൽക്കുന്നതായി ഛത്തീസ്ഗഡ് ചേംബർ ഓഫ് കൊമേഴ്സ് ചെയർമാൻ അമർ പർവാനിയും പരാതിയിൽ പറഞ്ഞു. ഈ സാഹചര്യത്തിൽ ആമസോണിലെ ഉദ്യോഗസ്ഥരെ റായ്പൂർ പോലീസ് ചോദ്യം ചെയ്തേക്കും.
അതേ സമയം ഉൽപ്പന്നങ്ങളിൽ ദേശീയ ചിഹ്നങ്ങൾ ഉപയോഗിച്ച ആമസോണിനെ ബഹിഷ്കരിക്കണമെന്ന ആവശ്യവും സോഷ്യൽ മീഡിയയിൽ ഉയർന്നിട്ടുണ്ട് .
