ന്യൂഡൽഹി: 18-ാമത് ബ്രിക്സ് ഉച്ചകോടിയിൽ പങ്കെടുക്കാൻ റഷ്യൻ പ്രസിഡന്റ് വ്ളാദിമിർ പുടിൻ ഇന്ത്യയിലെത്തും. സെപ്റ്റംബർ 12, 13 തീയതികളിൽ ന്യൂഡൽഹിയിലെ ഭാരത് മണ്ഡപത്തിലാണ് ബ്രിക്സ് ഉച്ചകോടി നടക്കുന്നത്. സെപ്റ്റംബർ 11ന് പ്രധാനമന്ത്രി നരേന്ദ്ര മോദിയുമായി പുടിൻ ഉഭയകക്ഷി കൂടിക്കാഴ്ച നടത്തുമെന്നും ക്രെംലിൻ വക്താവ് ദിമിത്രി പെസ്കോവ് അറിയിച്ചു.
കുറച്ച് ദിവസങ്ങൾക്കുള്ളിൽ പുടിൻ ഇന്ത്യയിലേക്ക് യാത്ര തിരിക്കുമെന്നും ബ്രിക്സ് ഉച്ചകോടിയിൽ പങ്കെടുക്കുന്നതിനൊപ്പം പ്രധാനമന്ത്രി മോദിയുമായി നിർണായക ചർച്ചകൾ നടത്തുമെന്നും പെസ്കോവ് ഇന്ത്യൻ മാധ്യമപ്രവർത്തകരുമായുള്ള ഓൺലൈൻ ആശയവിനിമയത്തിൽ വ്യക്തമാക്കി.
ഓഗസ്റ്റ് 31ന് കിർഗിസ്ഥാനിലെ ബിഷ്കെക്കിൽ നടന്ന ഷാങ്ഹായ് സഹകരണ സംഘടന (SCO) ഉച്ചകോടിക്കിടെയാണ് മോദിയും പുടിനും അവസാനമായി കൂടിക്കാഴ്ച നടത്തിയത്. ഇന്ത്യയും റഷ്യയും തമ്മിലുള്ള ബന്ധം കൂടുതൽ ശക്തമാകുകയാണെന്ന് അന്ന് പുടിൻ വ്യക്തമാക്കിയിരുന്നു. റഷ്യ–യുക്രെയ്ൻ സംഘർഷവും ഇരുനേതാക്കളും ചർച്ച ചെയ്തിരുന്നു. യുദ്ധം അവസാനിപ്പിച്ച് സമാധാനത്തിലേക്ക് നീങ്ങണമെന്ന ഇന്ത്യയുടെ നിലപാട് പ്രധാനമന്ത്രി മോദി ആവർത്തിച്ചു.
ഇന്ത്യ ഈ വർഷം ജനുവരി ഒന്നിനാണ് ബ്രിക്സ് അധ്യക്ഷസ്ഥാനം ഏറ്റെടുത്തത്. 2026ൽ നാലാം തവണയാണ് ഇന്ത്യ ബ്രിക്സിന് നേതൃത്വം നൽകുന്നത്. ബ്രിക്സ് രൂപീകരിച്ച് 20 വർഷം പൂർത്തിയാകുന്നതും ഈ വർഷമാണ്. ‘Building for Resilience, Innovation, Cooperation and Sustainability’ എന്നതാണ് ഇന്ത്യ മുന്നോട്ടുവച്ച 2026ലെ അധ്യക്ഷപദവി പ്രമേയം. വ്യാപാരം, കൃഷി, ആരോഗ്യം, ഊർജം, ഡിജിറ്റൽ സാങ്കേതികവിദ്യ, നഗരവികസനം, ചെറുകിട സംരംഭങ്ങൾ, സ്റ്റാർട്ടപ്പുകൾ, കാലാവസ്ഥാ പ്രവർത്തനം, സാംസ്കാരിക വിനിമയം തുടങ്ങിയ മേഖലകളിൽ പ്രായോഗിക സഹകരണം ശക്തമാക്കുന്നതിനാണ് ഇന്ത്യ പ്രാധാന്യം നൽകുന്നത്.
