ശൂന്യാകാശത്തെ നിഗൂഢതകളും വിസ്മയം ജനിപ്പിക്കുന്ന കാര്യങ്ങളും കണ്ടുപിടിക്കാനുള്ള തിരക്കിലാണ് ഗവേഷകർ എന്നും. അവരുടെ ചില കണ്ടുപിടിത്തങ്ങൾ എന്നും മറ്റുള്ളവരെ ആതിശയിപ്പിക്കുന്നതുമാണ്. ആകാശ ലോകത്തെ ഓരോ പുതിയ കാര്യങ്ങളും നാം അറിയുന്നത് ഇത്തരം ഗവേഷകരുടെ ഓരോ പഠനത്തിൽ നിന്നും കണ്ടെത്തലിൽ നിന്നുമാണ്. ഇത്തരത്തിൽ ഗവേഷകരെ വരെ ഞെട്ടിച്ച കണ്ടെത്തലിനെ കുറിച്ച് തുറന്ന് പറഞ്ഞിരിക്കുകയാണ് ഒരു ഓസ്‌ട്രേലിയൻ ശാസ്ത്രജ്ഞൻ.
ക്ഷീരപഥത്തിൽ അജ്ഞാതമായ ഒരു വസ്തു ചുറ്റിക്കറങ്ങുന്നുണ്ടെന്നാണ് ഓസ്‌ട്രേലിയൻ ശാസ്ത്രജ്ഞർ കണ്ടെത്തിയത്. ഇതിന് മുൻപ് ഇത്തരത്തിലൊരു വസ്തുവിന്റെ സാന്നിധ്യം ക്ഷീരപഥത്തിൽ ഉണ്ടായിട്ടില്ലെന്നും ശാസ്ത്ര്ജ്ഞർ പറയുന്നു. കർട്ടിൻ യൂണിവേഴ്‌സിറ്റിയിലെ ഒരു വിദ്യാർത്ഥിയാണ് ആദ്യമായി ഈ വസ്തുവിന്റെ സാന്നിധ്യം തിരിച്ചറിഞ്ഞത്. ഓരോ 18 മിനിറ്റ് കൂടുമ്പോഴും ഒരു മിനിറ്റ് വരെ നീണ്ട് നിൽക്കുന്ന റേഡിയോ ഊർജ്ജം ഈ വസ്തു പുറപ്പെടുവിക്കുന്നു എന്നും വിദ്യാർത്ഥി കണ്ടെത്തി. ഇത്തരത്തിൽ ശൂന്യാകാശത്ത് വലിയ രീതിയിലുള്ള ഊർജ്ജം പുറപ്പെടുവിക്കുന്ന വസ്തുക്കളെ ധാരാളമായി കണ്ടെത്തിയിട്ടുണ്ടെങ്കിലും, ഇങ്ങനെ ഒരു അനുഭവം ഇതാദ്യമാണെന്ന് മറ്റ് ശാസ്ത്രജ്ഞർ പറയുന്നു.
കർട്ടിൻ യൂണിവേഴ്‌സിറ്റിയിലെ വിദ്യാർത്ഥിയായ ടിറോൺ ഒഡോഹെർട്ടിയാണ് ഈ നിഗൂഢ വസ്തുവിനെ കണ്ടെത്തിയത്. ഇതിനെ കുറിച്ച് കൂടുതൽ വിവരങ്ങൾ ലഭിക്കുന്നതിനായി കൂടുതൽ പഠനം നടത്തി വരികയാണെന്ന് ശാസ്ത്രജ്ഞർ വ്യക്തമാക്കി. കർട്ടിൻ യൂണിവേഴ്‌സിറ്റിയിലെ ജ്യോതിശാസ്ത്രജ്ഞൻ ഡോ.നതാഷ ഹർലി-വാക്കറിന്റെ നേതൃത്വത്തിലുള്ള സംഘമാണ് ഇതിനെ കുറിച്ച് പഠനം നടത്തുന്നത്.
‘ക്ഷീരപഥത്തിൽ കണ്ടെത്തിയ അജ്ഞാത വസ്തു ഇടയ്‌ക്കിടെ പ്രത്യക്ഷമാകുകയും പിന്നീട് അപ്രത്യക്ഷമാകുകയും ചെയ്യുന്നു. ഇത് തികച്ചും ആകസ്മികമായ ഒരു സംഭവം തന്നെയാണ്. ശാസ്ത്രജ്ഞർക്ക് ഇതൊരു ഭൂതാവിഷ്ടമായ വസ്തുവാണ്. പ്രപഞ്ചം ഉണ്ടായതിന് ശേഷം ഇത്തരത്തിലൊരു വസ്തുവിനെ കണ്ടെത്തുന്നത് ഇതാദ്യമായാണ്’ ശാസ്ത്രജ്ഞർ പറഞ്ഞു. ശൂന്യാകാശത്ത് മിന്നുകയും അണയുകയും ചെയ്യുന്ന വസ്തുക്കളുടെ സാന്നിധ്യം ജ്യോതിശാസ്ത്രജ്ഞർക്ക് പുതുമയുള്ള വിഷയമല്ല, എന്നാൽ ഇതിൽ നിന്നും വരുന്ന ഊർജ്ജവും ഇടയ്‌ക്കിടെ അണയുന്നതും പിന്നെ ജ്വലിക്കുകയും ചെയ്യുന്ന ഈ അജ്ഞാത വസ്തു തികച്ചും അത്ഭുതകരമാണെന്നും ശാസ്ത്രജ്ഞർ കൂട്ടിച്ചേർത്തു.
വർഷങ്ങൾ പഴക്കമുള്ള ഡാറ്റ വിശകലനം ചെയ്യുന്നുണ്ട്. അതിൽ നിന്നും ഈ അജ്ഞാത വസ്തു ഭൂമിയിൽ നിന്നും 4,000 പ്രകാശ വർഷം അകലെയാണെന്ന് കണ്ടെത്തി. എന്നിട്ടും അതിൽ നിന്നും വരുന്ന പ്രകാശത്തിന്റെ അളവും മാഗ്നറ്റിക് ഫീൽഡും വളരെ വലുതാണ്. കാര്യമെന്തായാലും ഈ അജ്ഞാത വസ്തുവിനെ കുറിച്ചുള്ള പഠനം പുരോഗമിക്കുകയാണെന്നും ശാസ്ത്രജ്ഞർ അറിയിച്ചു.
