ന്യൂഡൽഹി: കേന്ദ്ര ബജറ്റിന് ബജറ്റ് നിർമ്മാണ പ്രക്രിയയുടെ അവസാന ഘട്ടത്തെ അടയാളപ്പെടുത്തുന്ന ‘ഹൽവ ചടങ്ങ്’ ഉണ്ടായിരിക്കില്ലെന്ന് ധനമന്ത്രാലയം അറിയിച്ചു. കൊറോണ വ്യാപനത്തിന്റെ പശ്ചാത്തലത്തിലാണ് ഇത്തവണ ചടങ്ങ് റദ്ദാക്കിയത്. അതിനുപകരം ബജറ്റിനായി പ്രവർത്തിച്ച കോർ സ്റ്റാഫിന് മധുരപലഹാരങ്ങൾ അയയ്‌ക്കുമെന്ന് ധനമന്ത്രാലയം വ്യക്തമാക്കി.
എന്താണ് ഹൽവ ചടങ്ങ്?
എല്ലാ വർഷവും കേന്ദ്ര ബജറ്റ് അവതരിപ്പിക്കുന്നതിന് മുമ്പ് ധനമന്ത്രാലയം സെക്രട്ടേറിയറ്റ് കെട്ടിടത്തിന്റെ നോർത്ത് ബ്ലോക്ക് ബേസ്മെന്റിലുള്ള ഡൽഹി ആസ്ഥാനത്ത് ‘ഹൽവ ചടങ്ങ്’ നടത്താറുണ്ട്. ധനമന്ത്രി പരമ്പരാഗത കടായിയിൽ മധുരപലഹാരം കലക്കി ബജറ്റ് നിർമ്മാണ പ്രക്രിയയുമായി നേരിട്ട് ബന്ധപ്പെട്ട ധനകാര്യ സഹമന്ത്രിക്കും ഉദ്യോഗസ്ഥർക്കും മറ്റുള്ളവർക്കും വിളമ്പുന്ന രീതിയാണ് ‘ഹൽവ ചടങ്ങ്’. കൂടാതെ, ബജറ്റ് രേഖയുടെ അച്ചടിയുടെ തുടക്കം കുറിക്കാനും ‘ഹൽവ ചടങ്ങ്’ നടത്താറുണ്ട്. കഴിഞ്ഞ വർഷം കേന്ദ്രം ആദ്യ കടലാസ് രഹിത ബജറ്റ് അവതരിപ്പിച്ചിരുന്നു.
2022-23ലെ കേന്ദ്ര ബജറ്റ് ഫെബ്രുവരി ഒന്നിന് ധനമന്ത്രി നിർമ്മല സീതാരാമൻ പേപ്പർരഹിത രൂപത്തിൽ അവതരിപ്പിക്കും. മംഗളകരമായ ജോലി നിർവഹിക്കുന്നതിന് മുമ്പ് മധുരമുള്ള എന്തെങ്കിലും കഴിക്കുന്ന പാരമ്പര്യമുണ്ട്. ബജറ്റുമായി ബന്ധപ്പെട്ട രേഖകൾ അച്ചടിക്കുന്നതിന് ഏകദേശം 10 ദിവസം മുമ്പാണ് ചരിത്രപരമായ ഹൽവ ചടങ്ങ് നടത്താറുളളത്. ചടങ്ങിനുശേഷം, നോർത്ത് ബ്ലോക്ക് ബേസ്മെന്റിൽ ഉദ്യോഗസ്ഥരെ പുറംലോകവുമായി യാതൊരു ബന്ധമില്ലാത്തവിധം അകത്താകും.
ഫോണിലൂടെയോ ഇ-മെയിൽ പോലെയുള്ള മറ്റേതെങ്കിലും ആശയവിനിമയത്തിലൂടെയോ കുടുംബവുമായി ബന്ധപ്പെടാൻ പോലും അവർക്ക് അനുവാദമില്ല. വിവരങ്ങൾ ചോരുന്നത് തടയാൻ ധനമന്ത്രാലയത്തിനുള്ളിൽ മൊബൈൽ ഫോൺ ജാമറും സ്ഥാപിച്ചിട്ടുണ്ട്. ഇക്കാലയളവിൽ കെട്ടിടത്തിനകത്തേക്കും പുറത്തേക്കും മാറാൻ ധനമന്ത്രിക്ക് മാത്രമേ അനുമതിയുള്ളൂ. പാർലമെന്റിൽ യഥാർത്ഥ അവതരണം ആരംഭിക്കുന്നതിന് മുമ്പ് മാത്രമാണ് മന്ത്രാലയത്തിലെ ഉദ്യോഗസ്ഥരെ പുറത്താക്കുന്നത്.
