തിരുവനന്തപുരം: ലോകായുക്ത നിയമം ഭരണഘടനാ വിരുദ്ധമാണെന്ന പ്രസ്താവന നടത്തിയ നിയമ മന്ത്രി പി. രാജീവ്, സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണൻ എന്നിവർക്കെതിരെ അവകാശ ലംഘനത്തിന് നോട്ടീസ്. മാത്യു കുഴൽനാടൻ എം.എൽ.എയാണ് നിയമസഭ സ്പീക്കർക്ക് നോട്ടീസ് നൽകിയത്.
ലോകായുക്ത നിയമത്തിലെ ഏതെങ്കിലും വ്യവസ്ഥകൾ ഭരണഘടനാ വിരുദ്ധമാണെന്ന ഒരു വിധി കോടതികളുടെ ഭാഗത്തുനിന്നുണ്ടായിട്ടില്ലെന്ന് നോട്ടീസിൽ ചൂണ്ടിക്കാട്ടുന്നു. ഇത് പരിഗണിക്കാതെയാണ് നിയമം ഭരണഘടനാ വിരുദ്ധമാണ് എന്ന രീതിയിൽ മന്ത്രി പി. രാജീവ് മാധ്യമങ്ങളോട് പൊതു പ്രസ്താവന നടത്തിയതെന്ന് നോട്ടീസിൽ പറയുന്നു. ഇത് നിയമ സഭയോടുള്ള കടുത്ത അവഹേളനമാണ്.
സമാനരീതിയിലുള്ള വാദഗതികൾ ഉന്നയിച്ച് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ കഴിഞ്ഞ 28 ന് ദേശാഭിമാനി ദിനപത്രത്തിൽ ലേഖനവും എഴുതിയതായി നോട്ടീസിൽ പറയുന്നു. മന്ത്രിയുടെ പ്രസ്താവനയും കോടിയേരിയുടെ ലേഖനവും ചൂണ്ടിക്കാട്ടിയാണ് മാത്യു കുഴൽനാടൻ സ്പീക്കർക്ക് അവകാശ ലംഘന നോട്ടീസ് നൽകിയത്.
Comments