മുംബൈ: ക്രിക്കറ്റ് ചരിത്രത്തിന്റെ സുവർണതാളുകളിലേയ്‌ക്ക് കടന്നുകയറിയ ഇന്ത്യയുടെ മറ്റൊരു യുവനിരയ്‌ക്ക് അഭിനന്ദന പ്രവാഹമാണ് ലഭിക്കുന്നത്. അണ്ടർ-19 ലോകകപ്പ് ഫൈനലിൽ ഇംഗ്ലണ്ടിനെ തകർത്താണ് ഇന്ത്യയുടെ കൗമാരപ്പട അഞ്ചാം കിരീടത്തിൽ മുത്തമിട്ടത്. ബിസിസിഐ പ്രസിഡന്റ് സൗരവ് ഗാംഗുലിയും ടീമിന് അഭിനന്ദനങ്ങൾ നേർന്നു. ട്വിറ്ററിലൂടെയാണ് ഗാംഗുലി അഭിനന്ദനങ്ങൾ നേർന്നത്. കൂടാതെ, ബിസിസിഐ സെക്രട്ടറി ജയ് ഷായും ടീമിനെ അഭിനന്ദിച്ചു.
‘ഇത്രയും മനോഹരമായ രീതിയിൽ ഇന്ത്യ ലോകകപ്പ് നേടിയതിൽ ടീമിനെയും സപ്പോർട്ടിങ് സ്റ്റാഫിനെയും സെലക്ടർമാരെയും അഭിനന്ദിക്കുന്നു. അവരുടെ അധ്വാനത്തിന് വിലയിടാനാവില്ലെങ്കിലും പ്രോത്സാഹനമെന്ന നിലയിലാണ് 40 ലക്ഷം രൂപ സമ്മാനമായി പ്രഖ്യാപിച്ചത്’ ബിസിസിഐ പ്രസിഡന്റും മുൻ ഇന്ത്യൻ നായകനുമായ സൗരവ് ഗാംഗുലി ട്വിറ്ററിൽ കുറിച്ചു.
‘ഇന്ത്യയ്‌ക്ക് ഇത് അഭിമാന നിമിഷമാണ്. അണ്ടർ-19 ലോകകപ്പിൽ ഇന്ത്യയ്‌ക്ക് വിജയം സമ്മാനിച്ച എല്ലാ കളിക്കാർക്കും 40 ലക്ഷം രൂപ വീതവും, എല്ലാ സപ്പോർട്ടിങ് സ്റ്റാഫുകൾക്കും 25 ലക്ഷം രൂപ പാരിതോഷികം പ്രഖ്യാപിക്കുന്നു. ഏറെ അഭിമാനത്തോടെയാണ് ഞാൻ ഇക്കാര്യം അറിയിക്കുന്നത്’ ജയ് ഷാ ട്വീറ്റ് ചെയ്തു.
പൃഥ്വി ഷായ്‌ക്ക് ശേഷം ഇന്ത്യയെ അണ്ടർ-19 ലോകകപ്പ് കിരീടം ചൂടിപ്പിക്കുന്ന നായകനായി മാറിയിരിക്കുകയാണ് യഷ് ധൂൽ. 2020ൽ ബംഗ്ലാദേശിനോട് പൊരുതി തോൽക്കേണ്ടി വന്നതിന്റെ ക്ഷീണം ഇംഗ്ലണ്ടിനെ തോൽപ്പിച്ച് കിരീടം സ്വന്തമാക്കി ഇന്ത്യ മാറ്റിയിരിക്കുകയാണ്. ടോസ് നേടി പ്രതീക്ഷയോടെ ബാറ്റിങ് തിരഞ്ഞെടുത്ത ഇംഗ്ലണ്ടിനെ ഇന്ത്യൻ ബൗളർമാർ അമ്പേ പരാജയപ്പെടുത്തുകയായിരുന്നു. രാജ് ബവ 9.5 ഓവറിൽ 31 റൺസ് വഴങ്ങി അഞ്ച് വിക്കറ്റ് വീഴ്‌ത്തിയപ്പോൾ 9 ഓവറിൽ 34 റൺസ് വിട്ടുകൊടുത്ത് നാല് വിക്കറ്റാണ് രവി കുമാർ നേടിയത്. കൗശൽ താംബെ ഒരു വിക്കറ്റും സ്വന്തമാക്കി. ഷെയ്ഖ് റഷീദ് (50), നിഷാന്ത് സിന്ധു (50) നോട്ട്ഔട്ട് എന്നിവരുടെ ബാറ്റിങ് പ്രകടനമാണ് ഇന്ത്യക്ക് കരുത്തായത്.
