ഒന്റാറിയോ : കാനഡയിലെ ഹിന്ദു ക്ഷേത്രങ്ങളിൽ മോഷണം. ഒന്റാറിയോപീൽ റീജിയണിലെ മൂന്ന് ക്ഷേത്രങ്ങളിലാണ് മോഷണം നടന്നത്. സംഭവത്തിൽ പോലീസ് അന്വേഷണം ആരംഭിച്ചു.
മിസ്സിസ്സാഗയിലെ പ്രസിദ്ധ ക്ഷേത്രമായ ഹെറിറ്റേജ് സെന്റർ, ബ്രാംപ്ടണിലെ മാ ചിന്ത്പൂർണി മന്ദിർ, ശ്രീ ഗൗരി ശങ്കർ മന്ദിർ എന്നീ ക്ഷേത്രങ്ങളിലാണ് കവർച്ച നടന്നത്. മൂന്ന് ക്ഷേത്രങ്ങളിൽ നിന്നുമായി 25,000 ഡോളറിലധികം പണം മോഷണം പോയിട്ടുണ്ട്. ക്ഷേത്രം തകർത്താണ് അക്രമി മോഷണം നടത്തിയത് എന്നതിനാൽ ലക്ഷക്കണക്കിന് രൂപയുടെ നഷ്ടമാണ് ഉണ്ടായിരിക്കുന്നത് എന്നാണ് ക്ഷേത്രം അധികൃതർ പറയുന്നത്.
ജനാലകളും, വാതിലിന്റെ പൂട്ടും തകർത്താണ് മോഷ്ടാവ് ക്ഷേത്രത്തിന് അകത്തേക്ക് കടന്നിരിക്കുന്നത്. ഭണ്ഡാരങ്ങളും തകർത്തിട്ടുണ്ട്.ഇതിന് പുറമേ പൂജയ്ക്കായി സൂക്ഷിച്ചിരുന്ന സാമഗ്രികളും നശിപ്പിച്ചാണ് ഇയാൾ കടന്നു കളഞ്ഞത്. ചെറിയ കാണിക്ക വഞ്ചികളും ക്ഷേത്രങ്ങളിൽ നിന്നും മോഷ്ടിച്ചിട്ടുണ്ട്.
അന്വേഷണത്തിന്റെ ഭാഗമായി പോലീസ് ക്ഷേത്രങ്ങളിലെ സിസിടിവി ഉൾപ്പെടെ പരിശോധിച്ചു. കാണിക്ക വഞ്ചിയുമായി രക്ഷപ്പെടുന്ന മോഷ്ടാക്കളുടെ ദൃശ്യങ്ങൾ സിസിടിവിയിൽ നിന്നും പോലീസിന് ലഭിച്ചിട്ടുണ്ട്. ഇതിന്റെ അടിസ്ഥാനത്തിലാണ് അന്വേഷണം പുരോഗമിക്കുന്നത്. പ്രതിയെ പിടികൂടുന്നതിനായി പ്രദേശവാസികളുടെ സഹായവും പോലീസ് തേടിയിട്ടുണ്ട്.
