സെലിബ്രിറ്റികളുടെ ജീവിതത്തെക്കുറിച്ചും അവരുടെ ജീവിതശൈലികളെ കുറിച്ചുമെല്ലാം അറിയാന്‍ പലര്‍ക്കും വളരെയധികം താത്പര്യമാണ്. ആരോഗ്യത്തിന് വളരെയധികം പ്രാധാന്യം നല്‍കുന്നതായിരിക്കും അവരുടെ ഭക്ഷണക്രമവും. കഴിഞ്ഞ ദിവസം സമൂഹമാദ്ധ്യമത്തില്‍ ആസ്‌ക് മി എനിതിങ് എന്ന സെക്ഷനില്‍ തന്റെ പ്രഭാത ഭക്ഷണത്തെ കുറിച്ച് രണ്‍വീര്‍ സിങ്ങ് വെളിപ്പെടുത്തിയിരുന്നു. ശരിരം ഫിറ്റ് ആയിരിക്കണമെങ്കില്‍ ശരീരം ആവശ്യപ്പെടുന്നത് അതിന് നല്‍കണമെന്നതാണ് രണ്‍വീറിന്റെ തത്വം. എരിവുള്ള ഭക്ഷണങ്ങള്‍ ഇദ്ദേഹം അധികമായി കഴിക്കാറില്ല. വിദഗ്ധരുടെ നിര്‍ദ്ദേശപ്രകാരം തയ്യാറാക്കിയ പ്രഭാതഭക്ഷണമാണ് രണ്‍വീണ്‍ പിന്തുടരുന്നത്.
130 ഗ്രാം ഓട്‌സ്, 15 ഗ്രാം നട്‌സ്, 5 ഗ്രാം ലോക്കലേറ്റ് ചിപ്‌സ്, ഡീടോക്‌സ് ഡ്രിങ്ക് എന്നിവയും അവസാനമായി ശിലാജിത്ത്-അശ്വഗന്ധ ഡേറ്റ് ബോളുമാണ് അദ്ദേഹം രാവിലെ ഭക്ഷണത്തില്‍ ഉള്‍പ്പെടുത്തിയിരിക്കുന്നത്. ഇന്‍സ്റ്റഗ്രാമില്‍ രണ്‍വീര്‍ ഇതു പറഞ്ഞതിന് പിന്നാലെ ഏറ്റവും കൂടുതല്‍ ആളുകള്‍ അന്വേഷിച്ചത് ശിലാജിത്-അശ്വഗന്ധ ഡേറ്റ് ബോളിനെ കുറിച്ചാണ്. ആയുര്‍വേദത്തില്‍ ഏറെ ഔഷധഗുണമുള്ളതായി പറയപ്പെടുന്ന വസ്തുക്കളാണ് ശിലാജിത്തും അശ്വഗന്ധയും. ഹിമാലയത്തിലെ പാറകളില്‍ കാണപ്പെടുന്ന കറുപ്പും തവിട്ടും നിറം ഇടകലര്‍ന്ന ഒരു വസ്തുവാണ് ശിലാജിത്.
വര്‍ഷങ്ങളോളം ചെടികള്‍ അഴുകി ധാതുക്കളുമായി കലര്‍ന്നാണ് ശിലാജിത് രൂപപ്പെടുന്നത്. ധാതുക്കളും ആന്റി ഓക്‌സിഡന്റുകളുമെല്ലാം ഇതില്‍ ധാരാളമായി അടങ്ങിയിട്ടുണ്ട്. സമ്മര്‍ദ്ദവും ഉത്കണ്ഠയും അകറ്റാനും ഇത് സഹായിക്കുന്നു. ശിലാജിത്തും അശ്വജിത്തും ചേരുമ്പോള്‍ അവ ശരീരത്തിലെ ഫ്രീ റാഡിക്കല്‍സിനെ തടഞ്ഞ് കോശങ്ങളുടെ നാശം കുറയ്‌ക്കുന്നു. അതായത് വാര്‍ധക്യം ബാധിക്കുന്നത് മെല്ലെയാകാന്‍ സഹായകരമാണ് ഈ കൂട്ട്.
സമ്മര്‍ദ്ദമുണ്ടാക്കുന്ന ഹോര്‍മോണായ കോര്‍ട്ടിസോളിന്റെ അളവ് കുറയ്‌ക്കാന്‍ അശ്വഗന്ധ ഫലപ്രദമാണ്. അതേപോലെ തലച്ചോറിലെ ഡോപ്പമിന്‍ ഉത്പാദനം കൂട്ടാന്‍ ശിലാജിത് സഹായിക്കുന്നു. ഇത് ശരീരത്തിന് സന്തോഷം പ്രദാനം ചെയ്യുന്നു. അണുബാധയും നീര്‍ക്കെട്ടുമെല്ലാം അകറ്റാനും അശ്വഗന്ധ ഫലപ്രദമാണ്. ഓര്‍മ്മശക്തി വര്‍ധിപ്പിക്കാനും, അള്‍ഷിമേഴ്‌സ് പോലെയുള്ള രോഗങ്ങളെ പ്രതിരോധിക്കാനും ശിലാജിത്-അശ്വഗന്ധ കൂട്ടിന് സാധിക്കും.
