ന്യൂഡല്ഹി:ദുബായിലേക്കുള്ള വിമാന യാത്രയ്ക്ക് ഏര്പ്പെടുത്തിയിരുന്ന റാപിഡ് ടെസ്റ്റ് ഒഴിവാക്കി. വിമാനത്താവളത്തില് നിന്നുള്ള റാപിഡ് ടെസ്റ്റ് ഇല്ലാതെ തന്നെ ഇനി മുതല് ദുബായിയിലേക്ക് യാത്ര ചെയ്യാം. എന്നാല് 48 മണിക്കൂറിനിടെയുള്ള പിസിആര് നെഗറ്റിവ് ഫലം നിര്ബന്ധമാണ്.
ഇന്ത്യയില് കൊറോണ കേസുകളില് വലിയ കുറവ് റിപ്പോര്ട്ട് ചെയ്തതിന് പിന്നാലെയാണ് ഇന്ത്യയിലെ വിമാന താവളങ്ങളില് നിന്നും ദുബായിലേക്ക് യാത്ര ചെയ്യാന് ആര്ടിപിസിആര് ടെസ്റ്റ് വേണമെന്ന നിബന്ധന ഒഴിവാക്കിയത്. ഇളവ് ഇതിനോടകം പ്രാബല്യത്തില് വന്നു കഴിഞ്ഞു.എന്നാല് അംഗീകൃത ലാബില് നിന്ന് 48 മണിക്കൂറിനിടെയുള്ള ആര് ടി പി സി ആര് നെഗറ്റിവ് ഫലം കയ്യില് കരുതണം എന്ന നിബന്ധനയില് ഇളവില്ല. നിലവില് ദുബായ് വിമാനത്താവളത്തിലേക്ക് മാത്രമാണ് റാപിഡ് ടെസ്റ്റ് ഒഴിവാക്കിയിട്ടുള്ളത്.
യുഎഇയിലെ മറ്റ് എമിറേറ്റുകളിലേക്ക് യാത്ര ചെയ്യുന്നവര് കേരളത്തിലെ വിമാനത്താവളത്തില് നിന്ന് റാപിഡ് ടെസ്റ്റ് എടുക്കണം. ദുബായ് വിമാനത്താവളത്തില് വന്നിറങ്ങിയാല് പിസിആര് ടെസ്റ്റ് ഉണ്ടാകും. അതിന്റെ ഫലം വരുന്നത് വരെ ക്വാറന്റീനില് പ്രവേശിക്കണം. ആറു മുതല് പന്ത്രണ്ട് മണിക്കൂറിനുള്ളില് ഫലം പുറത്ത് വരും. നാല്പത്തിയെട്ട് മണിക്കൂറിനിടെയുള്ള പരിശോധനയയ്ക്ക് ശേഷം വിമാനത്താവളത്തിലെ റാപിഡ് ടെസ്റ്റില് പരാജയപ്പെട്ട് ഒട്ടനവധി പ്രവാസികള്ക്ക് യാത്ര മുടങ്ങുന്നുണ്ട്. ഈ അവസ്ഥയ്ക്കാണ് ഇതോടെ പരിഹാരമാകുന്നത്.
അതിനിടെ അബുദാബി വിമാനത്താവളത്തില് നിന്ന് ഇന്ത്യയിലേക്ക് യാത്ര ചെയ്യുന്നവര്ക്ക് പിസിആര് പരിശോധനാഫലം നിര്ബന്ധമെന്ന് എയര് ഇന്ത്യ എക്സ്പ്രസ് അറിയിച്ചു. യാത്രയ്ക്ക് 72 മണിക്കൂറിനുള്ളിലെടുത്ത പിസിആര് പരിശോധനയുടെ ഫലം ഇവര് ഹാജരാക്കണമെന്ന് എയര് ഇന്ത്യ എക്സ്പ്രസ് വ്യക്തമാക്കി. ഇന്ത്യയില് നിന്ന് കൊറോണ വാക്സിന്റെ രണ്ട് ഡോസും സ്വീകരിച്ചവര്ക്ക് യാത്രയ്ക്ക് മുമ്പ് പിസിആര് പരിശോധന ആവശ്യമില്ലെന്ന് എയര് ഇന്ത്യ അടക്കമുള്ള വിമാന കമ്പനികള് അറിയിച്ചിരുന്നു. ഇതില് നിന്നാണ് അബുദാബിയെ ഒഴിവാക്കിയത്.
Comments