റെയിൽവേ യാത്ര ഇനി ഉല്ലാസകരം; ട്രെയിനുകളിൽ റേഡിയോ സംവിധാനം ഒരുക്കാൻ ഇന്ത്യൻ റെയിൽവേ

ന്യൂഡൽഹി: ട്രെയിൻ യാത്ര കൂടുതൽ ആനന്ദകരമാക്കി തീർക്കുവാനും, സഞ്ചാരികരുടെ ബോറടി മാറ്റാനും ഒരുങ്ങുകയാണ് ഇന്ത്യൻ റെയിൽവേ. ഡൽഹി ഡിവിഷന് കീഴിലുള്ള ശതാബ്ദി, വന്ദേ ഭാരത് ട്രെയിനുകളിൽ റേഡിയോ സൗകര്യം ഒരുക്കാൻ പദ്ധതിയിട്ടിരിക്കുകയാണ് ഇന്ത്യൻ റെയിൽവേ.

സഞ്ചാരികൾക്ക് ‘ഉല്ലാസകരമായ യാത്ര’ എന്ന ലക്ഷ്യത്തോടെ റെയിൽവേ ഈ തീരുമാനം എടുക്കുകയും ഇൻഡോർ എന്റർടെയ്ൻമെന്റ് കമ്പനിയായ ഊക്ക റേഡിയോയുമായി കരാർ ഒപ്പിട്ടതായും റെയിൽവേ വ്യക്തമാക്കി. പദ്ധതി യാഥാർത്ഥ്യമാകുന്നതോടെ യാത്രക്കാർക്ക് ട്രെയിൻ യാത്ര കൂടുതൽ ആനന്ദകരമാക്കി തീർക്കുവാനും, ട്രെയിൻ സഞ്ചരിക്കുന്ന നഗരങ്ങളുടെ കൂടുതൽ വിശദാംശങ്ങൾ അറിയുവാനും സാധിക്കുമെന്ന് ഇന്ത്യൻ റെയിൽവേ പറഞ്ഞു.

യാത്രക്കാർ ആവശ്യപ്പെടുന്ന മുറയ്‌ക്ക് ഗാനങ്ങളും മറ്റ് പരിപാടികളും അവർക്ക് ആസ്വദിക്കാം. ഇതിനായി പ്രത്യേകം ആർജെകളെയും റെയിൽവേയിൽ നിയമിക്കും. ആദ്യഘട്ട പരീക്ഷണത്തിന്റെ ഭാഗമായി പത്ത് ശതാബ്ദി എക്‌സ്പ്രസ്സ് ട്രെയിനുകളിലും, രണ്ട് വന്ദേ ഭാരത് ട്രെയിനുകളിലുമാണ് ഈ സൗകര്യം ലഭ്യമാകുന്നത്.

ഡൽഹി, ലക്‌നൗ, ഭോപ്പാൽ, ചണ്ഡീഗഢ്, അമൃത്സർ, അജ്മീർ, ഡെറാഡൂണ്, കാൻപൂർ, വാരണാസി, കത്ര, കത്‌ഗോദം എന്നീ സ്ഥലങ്ങളിലേയ്‌ക്ക് ശതാബ്ദി/വന്ദേ ഭാരത് ട്രെയിനിലൂടെ യാത്ര ചെയ്യുന്ന സഞ്ചാരികൾക്ക് ഈ സൗകര്യം ലഭിക്കും എന്ന് ഇന്ത്യൻ റെയിൽവേ അറിയിച്ചു. റെയിൽവേ യാത്ര കൂടുതൽ ആനന്ദകരമാക്കാൻ കൂടുതൽ പരിപാടികൾ ഇന്ത്യൻ റെയിൽവേ ആസൂത്രണം ചെയ്യുന്നുണ്ട്.

English summary: Indian Railways To Soon Launch Radio Entertainment In Shatabdi, Vande Bharat Trains