ന്യൂഡൽഹി: യുക്രെയ്ൻ അതിർത്തിയിലേക്ക് കേന്ദ്രമന്ത്രിമാരെ അയയ്ക്കുന്നത് ഇന്ത്യൻ പൗരൻമാരോടുളള പ്രതിബദ്ധതയുടെ ഭാഗമെന്ന് കേന്ദ്രമന്ത്രി വി. മുരളീധരൻ. ഓപ്പറേഷൻ ഗംഗ വിജയകരമായി മുന്നേറുകയാണെന്ന് വ്യക്തമാക്കി ഫേസ്ബുക്കിലിട്ട കുറിപ്പിലാണ് വി. മുരളീധരൻ ഇക്കാര്യം വ്യക്തമാക്കിയത്. അതിനിടെ ഓപ്പറേഷൻ ഗംഗയുടെ ഭാഗമായി ഏഴാമത്തെ വിമാനവും മുംബൈയിൽ എത്തി.
രക്ഷാദൗത്യത്തിന് നേതൃത്വം നൽകാൻ നാല് കേന്ദ്ര മന്ത്രിമാരെ നേരിട്ട് അയക്കാനുള്ള പ്രധാനമന്ത്രിയുടെ തീരുമാനം ഓരോ ഇന്ത്യൻ പൗരനോടുമുള്ള കേന്ദ്രസർക്കാരിന്റെ പ്രതിബദ്ധത വ്യക്തമാക്കുന്നു. ഏതു പ്രതികൂല സാഹചര്യത്തിലും വിജയകരമായ രക്ഷാപ്രവർത്തനം നടത്തി അനുഭവസമ്പത്തുള്ള നയതന്ത്ര ശൃംഖലയാണ് 24 മണിക്കൂറും പ്രവർത്തിക്കുന്നതെന്ന് വി. മുരളീധരൻ പറഞ്ഞു.
കേന്ദ്ര വിദേശകാര്യ മന്ത്രാലയവും കീവിലെ ഇന്ത്യൻ എംബസിയും ഓരോ നിമിഷവും സ്ഥിതിഗതികൾ വിലയിരുത്തുകയാണ്. അതിന്റെ അടിസ്ഥാനത്തിൽ ഇതുമായി ബന്ധപ്പെട്ട പുതിയ അറിയിപ്പുകൾ എംബസി വെബ്സൈറ്റും സോഷ്യൽ മീഡിയ (ഫേസ്ബുക്ക്, ട്വിറ്റർ, ഇൻസ്റ്റാഗ്രാം) പോസ്റ്റുകൾ വഴി യുക്രെയ്നിൽ അകപ്പെട്ട ഇന്ത്യക്കാരോട് പങ്കുവയ്ക്കുന്നുണ്ട്. അത് കൃത്യമായി പിൻതുടരുവാൻ അദ്ദേഹം അഭ്യർത്ഥിച്ചു
ഓപ്പറേഷൻ ഗംഗയുടെ പുരോഗതി വിലയിരുത്താൻ ഇന്നലെ പ്രധാനമന്ത്രിയുടെ അദ്ധ്യക്ഷതയിൽ ചേർന്ന യോഗത്തിലാണ് യുക്രെയ്ന്റെ അതിർത്തി രാജ്യങ്ങളിലെ രക്ഷാപ്രവർത്തനം ഏകോപിപ്പിക്കാൻ നാല് കേന്ദ്രമന്ത്രിമാരെ ഓരോ രാജ്യങ്ങളിലും അയയ്ക്കാൻ തീരുമാനിച്ചത്.
റൊമാനിയ,മോൾഡോവ എന്നിവിടങ്ങളിൽ കൂടിയുള്ള രക്ഷാ പ്രവർത്തനങ്ങൾ ജോതിരാദിത്യ സിന്ധ്യ ഏകോപിപ്പിക്കും. കിരൺ റിജിജു സ്ലോവാക്യയിലും, ഹർദീപ് സിങ് പുരി ഹംഗറിയിലും വി.കെ.സിംഗ് പോളണ്ടിലുമാണ് രക്ഷാ പ്രവർത്തനങ്ങൾ ഏകോപിപ്പിക്കുക. അതിർത്തി രാജ്യങ്ങളിലേക്ക് എത്താൻ വിദ്യാർത്ഥികൾ ഉൾപ്പെടുന്ന ഇന്ത്യൻ സമൂഹം ഏറെ ബുദ്ധിമുട്ടുകൾ നേരിടുന്നതായി റിപ്പോർട്ടുകൾ ഉണ്ടായിരുന്നു. പോളണ്ട് അതിർത്തിയിൽ ഉൾപ്പെടെ വിദ്യാർത്ഥികളെ കഴിഞ്ഞ ദിവസം സൈന്യം തടയുകയും ചെയ്തിരുന്നു. ഈ സാഹചര്യത്തിലാണ് നേരിട്ട് കേന്ദ്രമന്ത്രിമാരെ അയച്ച് പ്രവർത്തനങ്ങൾ ഏകോപിപ്പിക്കാൻ പ്രധാനമന്ത്രി തീരുമാനിച്ചത്.
ബുക്കാറെസ്റ്റിൽ നിന്നും 182 യാത്രക്കാരുമായി പുറപ്പെട്ട വിമാനമാണ് മുംബൈയിൽ ലാൻഡ് ചെയ്തത്. ഓപ്പറേഷൻ ഗംഗയുടെ ഭാഗമായി എത്തിയ ഏഴാമത്തെ വിമാനമായിരുന്നു ഇത്. ഇന്നലെ രാത്രി ആറാമത്തെ വിമാനം 240 പേരുമായി ഡൽഹിയിൽ എത്തിയിരുന്നു.
