മോസ്‌കോ: യുക്രെയ്‌നിൽ അധിനിവേശം നടത്തിയ റഷ്യൻ സേനയുടെ ടാങ്കുകളുടെ വശങ്ങളിലായി ഇംഗ്ലീഷ് അക്ഷരമാലയിലെ ‘സെഡ്’ അക്ഷരം എഴുതിയിരിക്കുന്ന ചിത്രങ്ങൾ കഴിഞ്ഞ ദിവസങ്ങളിൽ പുറത്ത് വന്നിരുന്നു. ടാങ്കുകളിൽ വെളുത്ത നിറത്തിൽ വലിയ അക്ഷരത്തിലാണ് ഇങ്ങനെ എഴുതിയിരിക്കുന്നത്. റഷ്യൻ അക്ഷരമാലയിൽ ‘സെഡ്’ എന്ന അക്ഷരവുമില്ല. അപ്പോൾ പിന്നെ ഇതെന്താണെന്ന സംശയമാണ് പലരും ഉന്നയിച്ചത്.
ശത്രുരാജ്യത്തിന്റെ യുദ്ധവാഹനങ്ങളിൽ നിന്ന് തങ്ങളുടെ വാഹനങ്ങളെ വേർതിരിച്ച് അറിയുന്നതിന് വേണ്ടിയാണ് റഷ്യ ഇത്തരത്തിൽ രേഖപ്പെടുത്തിയിരിക്കുന്നത് എന്നാണ് പ്രതിരോധ രംഗത്തെ വിദഗ്ധർ പറയുന്നത്. യുക്രെയ്‌നും റഷ്യയും അയൽരാജ്യങ്ങൾ ആയതിനാൽ ഇരുകൂട്ടരുടേയും സൈനികവാഹനങ്ങൾക്ക് തമ്മിൽ സാദൃശ്യമുണ്ട്. റഷ്യ പ്രധാനമായും യുദ്ധസമയത്ത് ഉപയോഗിക്കുന്നത് ടി80 എന്ന ടാങ്കുകളാണ്. യുക്രെയ്ൻ ഉപയോഗിക്കുന്നത് ടി72 ടാങ്കുകളാണ്. ഇതും രണ്ടും തമ്മിൽ സാമ്യങ്ങൾ ഏറെയാണ്. യുദ്ധം രൂക്ഷമാകുന്ന സാഹചര്യത്തിൽ ടാങ്കുകൾ മാറി റഷ്യൻ സേന സ്വന്തം ടാങ്കുകൾക്ക് നേരെ വെടിയുതിർക്കാതിരിക്കാനാണ് ഈ നീക്കമെന്നും ഇവർ പറയുന്നു.
എന്നാൽ രാജ്യാന്തര യുദ്ധശാസ്ത്ര വിദഗ്ധർ ഈ വാദങ്ങളെ തള്ളുന്നുണ്ട്. വാഹനങ്ങളിൽ രേഖപ്പെടുത്തിയിരിക്കുന്ന ഈ സെഡ് ചിഹ്നം ദൂരെ നിന്ന് കാണുക വളരെയധികം ബുദ്ധിമുട്ടാണെന്നാണ് ഇവർ പറയുന്നത്. മാത്രമല്ല പല രീതിയിലാണ് ചിഹ്നങ്ങൾ രേഖപ്പെടുത്തിയിരിക്കുന്നത്. ചില ടാങ്കുകളിൽ സെഡ് ചിഹ്നം മാത്രമാണ് ഉള്ളത്. മറ്റ് ചിലതിലാകട്ടെ ഇതിനൊപ്പം വൃത്തങ്ങൾ, ത്രികോണങ്ങൾ, സമചതുരങ്ങൾ എന്നിവയും ഉണ്ട്. ചിഹ്നങ്ങൾ ഓരോ മേഖല മാറുന്നതിനനുസരിച്ച് മാറി രേഖപ്പെടുത്തുന്നതാണെന്നും അഭിപ്രായങ്ങൾ ഉണ്ട്.
