തിരുവനന്തപുരം: കേന്ദ്രത്തിനെതിരെ രൂക്ഷവിമര്ശനവുമായി നോര്ക്ക വൈസ് ചെയര്മാന് പി.ശ്രീരാമകൃഷ്ണന്. വിദ്യാര്ത്ഥികളെ നാട്ടിലെത്തിക്കാനുള്ള ശ്രമം കേന്ദ്രം നേരത്തെ തുടങ്ങേണ്ടതായിരുന്നുവെന്നാണ് ശ്രീരാമകൃഷ്ണന്റെ വിമര്ശനം. 27ാം തിയതി തന്നെ മുഖ്യമന്ത്രി ഇത് സംബന്ധിച്ച് വിശദമായ കത്ത് നല്കിയിരുന്നു. വിദ്യാര്ത്ഥികളെ നാട്ടിലെത്തിക്കാനുള്ള മാര്ഗമുള്പ്പെടെ കത്തില് സൂചിപ്പിച്ചിരുന്നു. യുക്രെയ്നില് നിന്ന് മൂന്ന് വിമാനങ്ങളിലായി 600 പേരെ ഇന്ന് നാട്ടിലെത്തിക്കുമെന്നും ശ്രീരാമകൃഷ്ണന് പറഞ്ഞു.
17,000ത്തോളം ഇന്ത്യക്കാരാണ് ഇതുവരെ യുക്രെയ്ന് വിട്ടത്. അടുത്ത 24 മണിക്കൂറിനുള്ളില് 15 വിമാനങ്ങള് യുക്രെയ്ന്റെ അതിര്ത്തി രാജ്യങ്ങളില് നിന്ന് ഇന്ത്യയിലേക്ക് തിരിക്കുമെന്ന് വിദേശകാര്യവക്താവ് അരിന്ദം ബാഗ്ചി പറഞ്ഞു. 7000 മുതല് 8000 വരെ ഇന്ത്യന് പൗരന്മാരാണ് നിലവില് യുക്രെയ്നില് തുടരുന്നത്. ഇവരില് ഭൂരിഭാഗവും റഷ്യന് അതിര്ത്തിയോട് ചേര്ന്നാണ് ഇപ്പോഴുള്ളത്. ഇന്ത്യക്കാരെ സുരക്ഷിതമായി ഇന്ത്യയിലേക്ക് എത്തിക്കാന് തയ്യാറാണെന്ന് റഷ്യയും അറിയിച്ചിട്ടുണ്ട്.
Comments