തൃശൂർ: ക്ലാസിക്കൽ രംഗകലകളുടെ വളർച്ചയ്‌ക്കും കലാപ്രതിഭ ഉണ്ണായി വാര്യരുടെ സ്മരണയ്‌ക്കുമായി നിലകൊള്ളുന്ന ഇരിങ്ങാലക്കുട ‘ഉണ്ണായി വാര്യർ സ്മാരക കലാനിലയ’ത്തിന് 50 ലക്ഷം രൂപ അനുവദിച്ചതായി മന്ത്രി ആർ. ബിന്ദു അറിയിച്ചു.
1955 ഡിസംബർ 7-ന് കഥകളിയുടെ പ്രചാരണത്തിനും പ്രോത്സാഹനത്തിനുമായി തുടങ്ങിയ സ്ഥാപനത്തിനെ പദ്ധതിയേതര വിഭാഗത്തിൽപ്പെടുത്തി അധിക ധനാനുമതിയായാണ് തുക നൽകുക. കഥകളി പരിശീലിപ്പിക്കുന്നതോടൊപ്പം ബിരുദതലത്തിലുള്ള കോഴ്സുകളും നടക്കുന്ന കലാനിലയത്തിന്റെ വളർച്ചയ്‌ക്ക് സർക്കാർ പ്രതിജ്ഞാബദ്ധമാണെന്ന് മന്ത്രി ബിന്ദു പറഞ്ഞു.
കഥകളി പ്രോത്സാഹിപ്പിക്കുക എന്ന ലക്ഷ്യത്തിനായി ആസ്വാദന സഹായികളടക്കം നിരവധി സജ്ജീകരണങ്ങളോടെയും, സാംസ്‌കാരിക വിനോദസഞ്ചാരത്തിന് വേദിയൊരുക്കാനുള്ള ആലോചനകളോടെയും പ്രവർത്തിക്കുന്ന കലാനിലയത്തെ വളർച്ചയുടെ അടുത്ത പടവുകളിലേക്ക് കൊണ്ടുപോകാനാണ് സർക്കാർ ശ്രമിക്കുന്നതെന്നും മന്ത്രി പറഞ്ഞു. ഭാരതീയ നൃത്ത്യകലകളിലെല്ലാം പരിശീലനം നൽകാനും പുതിയ സൗന്ദര്യശാസ്ത്ര സംരംഭങ്ങൾക്ക് തുടക്കം കുറിക്കാനുമുള്ള കലാനിലയത്തിന്റെ സ്വപ്നങ്ങൾക്കൊപ്പം സർക്കാരുണ്ടെന്നും ആർ. ബിന്ദു കൂട്ടിച്ചേർത്തു.
