തിരുവനന്തപുരം: അഞ്ച് സംസ്ഥാനങ്ങളിലെ വോട്ടെണ്ണൽ അവസാനിക്കാൻ മണിക്കൂറുകൾ മാത്രം ബാക്കി നിൽക്കേ അഞ്ചിടത്തും കോൺഗ്രസ് ദയനീയ പരാജയം ഏറ്റുവാങ്ങുന്ന കാഴ്ചയാണ് കാണുന്നത്. കോൺഗ്രസിന്റെ ദയനീയ പരാജയത്തെ പരിഹസിച്ചിരിക്കുകയാണ് മുഖ്യമന്ത്രി പിണറായി വിജയൻ.
അഴീക്കൽ പാലം ഉദ്ഘാട ചടങ്ങിലാണ് കോൺഗ്രസ് നേതാവ് രമേശ് ചെന്നിത്തലയെ മുഖ്യമന്ത്രി കളിയാക്കിയത്. നിങ്ങൾക്കിന്ന ദുർദിനമാണല്ലോ എന്നായിരുന്നു പൊതു വേദിയിൽ മുഖ്യമന്ത്രി ചെന്നിത്തലയോട് ചോദിച്ചത്. പാലം തുറന്ന ഈ ദിവസം തന്റെ ജീവിതത്തിലെ ഏറ്റവും സന്തോഷമുള്ള ദിവസമെന്നായിരുന്നു സ്വാഗത പ്രസംഗത്തിൽ ചെന്നിത്തല പറഞ്ഞത്. ഇതിന് മറുപടിയായിട്ടാണ് ഉദ്ഘാടന പ്രസംഗത്തിൽ നിങ്ങൾക്കിന്ന് ദുർദിനമാണല്ലോ എന്ന് മുഖ്യമന്ത്രി പരിഹസിച്ചത്.
ചെന്നിത്തലയെ വേദിയിൽ ഇരുത്തി പരിഹസിച്ചതിന് മറുപടിയുമായി രംഗത്തെത്തിയിരിക്കുകയാണ് കോൺഗ്രസ് നേതാവും മുൻ തൃത്താല എംഎൽഎയുമായ വിടി ബൽറാം.
ഞങ്ങൾക്കൊക്കെ ഇന്ന് ദുർദിനം തന്നെയാണ്. ഞങ്ങൾക്കതിന്റെ ദുഃഖവുമുണ്ട്. ഇന്നത്തെ ദിവസം സന്തോഷം തോന്നുന്നവർ സന്തോഷിച്ചാട്ടെ, ആഘോഷിക്കാൻ തോന്നുന്നവർ ആഘോഷിച്ചാട്ടെയെന്നാണ് യുവ കോൺഗ്രസ് നേതാവ് മുഖ്യമന്ത്രിക്ക് നൽകുന്ന മറുപടി. സമൂഹമാദ്ധ്യമത്തിലെ കുറിപ്പിലൂടെയാണ് അദ്ദേഹം മറുപടി നൽകിയത്.
Comments