ന്യൂഡൽഹി : ബിജെപിയെ വീണ്ടും വിജയത്തിലേക്ക് നയിച്ച വോട്ടർമാർക്ക് നന്ദി പറഞ്ഞ് കേന്ദ്ര ആഭ്യന്തര മന്ത്രി അമിത് ഷാ. എല്ലാ സംസ്ഥാനങ്ങളിലെയും അന്തിമ ഫലം പുറത്തുവന്നതിന് പിന്നാലെ ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം. അഞ്ച് സംസ്ഥാനങ്ങളിലെയും മുഖ്യമന്ത്രിമാരെ അദ്ദേഹം അഭിനന്ദിച്ചു.
ബിജെപിയ്ക്ക് ലഭിച്ച ഈ മിന്നും വിജയത്തിനായി കഠിനമായി പ്രയത്നിച്ച പാർട്ടി പ്രവർത്തകർക്കും, സംസ്ഥാന അദ്ധ്യക്ഷന്മാർക്കും, എല്ലാ യൂണിറ്റുകൾക്കും നന്ദി. സർക്കാരിന്റെയും പാർട്ടിയുടെയും ആശയങ്ങൾ വീടുകൾ തോറും എത്തിച്ചതാണ് ഈ വിജയത്തിന് കാരണം ആയത്. ഉത്തർപ്രദേശ് ജനതയുടെ പ്രതീക്ഷകളും, സ്വപ്നങ്ങളും യാഥാർത്ഥ്യമാക്കുകയാണ് ബിജെപിയുടെ ലക്ഷ്യമെന്നും അമിത് ഷാ ട്വീറ്റ് ചെയ്തു.
ബിജെപിയിൽ വിശ്വാസം അർപ്പിച്ച ഗോവയിലെ ജനങ്ങൾക്ക് നന്ദി. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ഗോവയിലെ സഹോദരങ്ങളുടെ ആഗ്രഹങ്ങൾ സഫലമാക്കി. മുഖ്യമന്ത്രി പ്രമോദ് സാവന്തിനും മറ്റ് കാര്യകർത്താക്കൾക്കും അകമഴിഞ്ഞ നന്ദി അറിയിക്കുന്നതായും അമിത് ഷാ പറഞ്ഞു.
ബിജെപിയെ വിജയിപ്പിച്ച മണിപ്പൂരിന് നന്ദി. വടക്ക് കിഴക്കൻ സംസ്ഥാനങ്ങളുടെ അഭിവൃദ്ധി ലക്ഷ്യമിട്ടാണ് പ്രധാനമന്ത്രി നരേന്ദ്ര മോദിയുടെ പ്രവർത്തനം. ഇത് ഇവിടുത്തെ ജനങ്ങളുടെ ഹൃദയത്തിൽ ഒരു സ്ഥാനം ഉണ്ടാക്കി. മുഖ്യമന്ത്രി എൻ ബിരേൻ സിംഗിന് അഭിനന്ദനങ്ങൾ അറിയിക്കുകയാണെന്നും അമിത് ഷാ ട്വീറ്റ് ചെയ്തു.
വീണ്ടും സേവിക്കാൻ അവസരം നൽകിയതിൽ ഉത്തരാഖണ്ഡിലെ ജനങ്ങൾക്ക് നന്ദി. പൊതുജന സേവനങ്ങളിലും, വികസന പ്രവർത്തനങ്ങളിലും മണിപ്പൂർ ജനതയ്ക്കുള്ള വിശ്വാസമാണ് ദേവഭൂമിയിൽ പ്രതിഫലിച്ചതെന്നും അദ്ദേഹം വ്യക്തമാക്കി.
