അമൃത്സര്: പഞ്ചാബില് കോണ്ഗ്രസിനെ മലര്ത്തിയടിച്ച് അധികാരത്തിലെത്തിയ ആം ആദ്മി പാര്ട്ടിയെ വീണ്ടും പ്രകീര്ത്തിച്ച് നവ്ജ്യോത് സിങ് സിദ്ധു. പഞ്ചാബ് കോണ്ഗ്രസ് അധ്യക്ഷ സ്ഥാനം ഒഴിഞ്ഞ് ഒരു ദിവസത്തിന് ശേഷമാണ് ആപ്പിനെ പ്രശംസിച്ചും കോണ്ഗ്രസിനെ ഇകഴ്ത്തിയും സിദ്ധു പരാമര്ശം നടത്തിയത്. കഴിഞ്ഞ ദിവസമാണ് പഞ്ചാബിന്റെ പുതിയ മുഖ്യമന്ത്രിയായി ഭഗവന്ത് മന് സത്യപ്രതിജ്ഞ ചെയ്ത് ചുമതലയേറ്റത്. പഞ്ചാബില് മാഫിയ വിരുദ്ധ യുഗത്തിന് ഇതോടെ തുടക്കം കുറിയ്ക്കുകയാണെന്നാണ് സത്യപ്രതിജ്ഞയ്ക്ക് ശേഷം ഭഗവന്ത് മന്നിനെ പ്രശംസിച്ച് സിദ്ധു പറഞ്ഞത്.
‘ ആരും പ്രതീക്ഷിക്കാത്ത ആളായിരിക്കും ഏറ്റവും സന്തുഷ്ടനായ മനുഷ്യന്. ഏറെ പ്രതീക്ഷകളോടെ എത്തിയ ഭഗവന്ത് മന് പഞ്ചാബില് ഒരു മാഫിയ വിരുദ്ധ യുഗത്തിന് തുടക്കം കുറിക്കുകയാണ്. അദ്ദേഹം അവസരത്തിനൊത്ത് ഉയരുമെന്നാണ് പ്രതീക്ഷിക്കുന്നത്. ഏറ്റവും മികവോടെ പഞ്ചാബിനെ പുനരുജ്ജീവന പാതയിലേക്ക് കൊണ്ടുവരുമെന്നും പ്രതീക്ഷിക്കുന്നു. എല്ലാവിധ ആശംസകളും’ നേരുന്നുവെന്നും സിദ്ധു ട്വിറ്ററില് കുറിച്ചു.
പഞ്ചാബില് കോണ്ഗ്രസ് നേരിട്ട പരാജയത്തിന് പിന്നാലെയും ആപ്പിനെ അഭിനന്ദിച്ച് അദ്ദേഹം പ്രസ്താവന നടത്തിയിരുന്നു. ആം ആദ്മിയെ അധികാരത്തിലെത്തിച്ച പഞ്ചാബിലെ ജനങ്ങളുടെ തീരുമാനം ഏറ്റവും മികച്ചതാണെന്നാണ് അദ്ദേഹം പറഞ്ഞത്. ജനങ്ങളുടെ ശബ്ദം ദൈവത്തിന്റെ ശബ്ദമാണെന്നാണ് പറയുന്നത്. ജനങ്ങളുടെ വികാരം മനസിലാക്കുകയും അതിനെ അംഗീകരിക്കുകയും ചെയ്യുന്നുവെന്നും അദ്ദേഹം പറഞ്ഞിരുന്നു. അഞ്ച് സംസ്ഥാനങ്ങളിലായി നടന്ന തിരഞ്ഞെടുപ്പില് കോണ്ഗ്രസ് ഇക്കുറി ഏറ്റവും വലിയ തകര്ച്ച നേരിട്ടത് പഞ്ചാബിലാണ്. ഭരണത്തുടര്ച്ച ലക്ഷ്യമിട്ട് കളത്തിലിറങ്ങിയ കോണ്ഗ്രസിന് 18 സീറ്റുകളില് മാത്രമാണ് വിജയിക്കാനായത്.
Comments