ചെന്നൈ: ദേശീയ കബഡി താരത്തെ തൂങ്ങിമരിച്ച നിലയിൽ കണ്ടെത്തി. കബഡി താരമായ ഭാനുമതിയാണ് ജീവനൊടുക്കിയത്. തമിഴ്നാട്ടിലെ കാഞ്ചീപുരത്തെ വസതിയിലാണ് താരത്തെ ഫാനിൽ കെട്ടിതൂങ്ങിയ നിലയിൽ കണ്ടെത്തിയത്.
ഭാനുമതിയെ തൂങ്ങിയ നിലയിൽ കണ്ടെത്തിയതിന് പിന്നാലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ധർമ്മരാജ് എന്ന പച്ചക്കറി വ്യാപാരിയുടെ ഇളയ മകളാണ് ഭാനുമതി. സംസ്ഥാന തലത്തിലും ദേശീയ തലത്തിലും കബഡി മത്സരങ്ങളിൽ താരം പങ്കെടുത്തിട്ടുണ്ട്.
സംഭവത്തിൽ പോലീസ് കേസെടുത്തു. അന്വേഷണത്തിന്റെ ഭാഗമായി ഭാനുമതിയുടെ ഫോൺ പോലീസ് കണ്ടുകെട്ടി. സംസ്ഥാനത്തിനായി കളിച്ചിട്ടും, ഇതുവരെ നല്ലൊരു ജോലി ലഭിക്കാത്തതിൽ മനംനൊന്താണ് താരം ആത്മഹത്യ ചെയ്തതെന്നാണ് പ്രാഥമിക നിഗമനം. സംഭവത്തിൽ വിശദമായ അന്വേഷണം നടത്തിവരികയാണെന്നും പോലീസ് അറിയിച്ചു.
