ജയ്പൂർ: 25-കാരിയെ നിലത്തിട്ട് മർദ്ദിച്ച് ഓട്ടോ ഡ്രൈവർമാർ. മദ്യപിച്ച് ബഹളം സൃഷ്ടിച്ച യുവതിയെയാണ് ഓട്ടോ ഡ്രൈവർമാർ ചേർന്ന് മർദ്ദിച്ചത്. പോലീസുകാർ നോക്കിനിൽക്കെയായിരുന്നു സംഭവം. ബുധനാഴ്ച വൈകിട്ട് ഭരത്പൂരിലാണ് ആക്രമണമുണ്ടായത്. രണ്ട് പേർ ചേർന്നാണ് യുവതിയെ ആക്രമിക്കുന്നത്. ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വൈറലാണ്.
വീഡിയോ വൈറലായതിന് പിന്നാലെ ഓട്ടോ ഡ്രൈവർമാരെ പോലീസ് പിടികൂടി. ഇവർക്കെതിരെ വിവിധ വകുപ്പുകൾ പ്രകാരം കേസെടുത്ത് അറസ്റ്റ് ചെയ്തു. മഥുര ഗേറ്റ് പോലീസാണ് അക്രമികൾക്കെതിരെ കേസെടുത്തത്. മഹേഷ്, ചരൺ സിംഗ് എന്നീ രണ്ട് ഓട്ടോ ഡ്രൈവർമാരാണ് യുവതിയെ മർദ്ദിച്ചതെന്ന് പോലീസ് വ്യക്തമാക്കി. ഇവർ 25-കാരിയെ അടിച്ച് നിലത്തിടുകയും ചവിട്ടുകയും ചെയ്യുന്നത് ദൃശ്യങ്ങളിൽ വ്യക്തമാണ്.
അതേസമയം യുവതി മദ്യപിച്ച് ലക്കുക്കെട്ടിരുന്നതായും തുടർന്ന് വഴിയിൽ ബഹളമുണ്ടാക്കുകയായിരുന്നുവെന്നും പോലീസ് അറിയിച്ചു. യുവതിക്കെതിരെയും നടപടി സ്വീകരിച്ചിട്ടുണ്ട്. മർദ്ദനമേറ്റ ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്.
Comments