തിരുവനന്തപുരം: സ്വകാര്യ നിമിഷങ്ങൾ മൊബൈൽ ഫോൺ ഗ്യാലറികളിൽ സൂക്ഷിച്ചിരിക്കുന്നവർ ശ്രദ്ധിക്കണമെന്ന് മുന്നറിയിപ്പുമായി കേരള പോലീസ്. ആവശ്യപ്പെടുന്ന അനുമതികൾ എല്ലാം സമ്മതിച്ച് നമ്മൾ പല ആപ്പുകളും ഫോണിൽ ഇൻസ്റ്റാൾ ചെയ്യുന്നു. ഇതുമൂലം നാം അറിയാതെ തന്നെ നമ്മുടെ ഫോണിലെ വിവരങ്ങളും ഫയലുകളും ചോർത്തപ്പെടാനുള്ള സാധ്യതകളുണ്ടെന്ന് കേരള പോലീസ് നിർദേശിച്ചു.
മൊബൈൽ ഫോണിന്റെ ഉടമപോലും അറിയാതെ രഹസ്യ ആപ്ലിക്കേഷനുകൾ സ്ഥാപിക്കാൻ തട്ടിപ്പ് സംഘങ്ങൾക്ക് കഴിയും. അപരിചിത സന്ദേശങ്ങളിലൂടെ ലഭിക്കുന്ന ലിങ്കുകളിൽ കയറിയാൽ ഫോൺ ഗ്യാലറികളുടെ നിയന്ത്രണം കൈവശപ്പെടുത്താനും തട്ടിപ്പുകാർക്കാകും. ഇത്തരത്തിൽ തട്ടിപ്പ് നടത്തുന്ന രീതിയും വ്യാപകമാണ്.
മൊബൈലിലെ ക്യാമറ ഉടമയറിയാതെ തന്നെ നിയന്ത്രിക്കാൻ ഹാക്കറിനെ സഹായിക്കുന്ന മൊബൈൽ ആപ്ലിക്കേഷനുകൾ, ഡിലീറ്റ് ചെയ്ത ഫയലുകൾ, ഫോട്ടോകൾ, വിഡിയോകൾ എന്നിവ റിക്കവറി ചെയ്യാനുള്ള സോഫ്റ്റ് വെയറുകൾ തുടങ്ങിയവ ഇതിനായി ഉപയോഗിച്ചേക്കാം. അതിനാൽ സ്വകാര്യ നിമിഷങ്ങളിൽ ഫോൺ ഉപയോഗിക്കുന്നതും അത്തരം നിമിഷങ്ങൾ ഫോണിൽ പകർത്തുന്നതും സുരക്ഷിതമല്ലെന്ന് കേരള പോലീസ് നൽകുന്ന മുന്നറിയിപ്പിൽ പറയുന്നു.
