മുംബൈ: ഓഹരി വിപണിയിൽ കുതിച്ച് അദാനി ഗ്രൂപ്പിന്റെ അദാനി പവർ. രാജ്യത്തെ സ്വകാര്യ മേഖലയിലെ ഏറ്റവും വലിയ താപവൈദ്യുതി വിതരണക്കാരായ അദാനി പവർ ചൊവ്വാഴ്ച മാത്രം 12 ശതമാനം നേട്ടമാണ് ഓഹരി വിപണിയിൽ കരസ്ഥമാക്കിയത്.
ബോംബെ സ്‌റ്റോക്ക് എക്‌സ്‌ചേഞ്ചിൽ കഴിഞ്ഞ 52 ആഴ്ചയിലെ ഏറ്റവും ഉയർന്ന വിലയായ 170 രൂപ അദാനി പവർ രേഖപ്പെടുത്തി. കഴിഞ്ഞ ആറ് ദിവസമായി ഓഹരി വില ഉയർന്ന് തന്നെയായിരുന്നു. ഏകദേശം 37 ശതമാനം വളർച്ച ഒരാഴ്ച കൊണ്ട് നേടിയെടുത്തെന്നാണ് റിപ്പോർട്ട്.
ഗുജറാത്ത്, രാജസ്ഥാൻ, മഹാരാഷ്‌ട്ര, ഛത്തീസ്ഗഡ്, കർണാടക എന്നീ സംസ്ഥാനങ്ങളിലെ താപനിലയങ്ങളിൽ നിന്നും പ്രതിവർഷം പതിനായിരത്തിലധികം മെഗാവാട്ട് വൈദ്യുതിയാണ് അദാനി പവർ ഉത്പാദിപ്പിക്കുന്നത്. മഹാമാരിയുടെ ആഘാതത്തിൽ കഴിഞ്ഞ സാമ്പത്തിക വർഷം കമ്പനി നഷ്ടം നേരിട്ടിരുന്നു. എങ്കിലും 2021-22 വർഷത്തിൽ കമ്പനി വലിയ തോതിലാണ് വളർച്ച നേടിയത്. ഇപ്പോൾ കമ്പനിയുടെ ആറ് സബ്‌സീഡിയറി യൂണിറ്റുകളെ ലയിപ്പിക്കാനുള്ള നീക്കത്തിലാണ് അധികൃതർ. കൂടുതൽ സാമ്പത്തിക കരുത്ത് കൈവരിക്കുകയാണ് ഇതിലൂടെ ലക്ഷ്യമിടുന്നത്.
