കണ്ണൂർ: ജില്ലയിൽ വൻ ലഹരി വേട്ട. കണ്ണൂർ ടൗൺ ഇൻസ്പെക്ടർ നടത്തിയ റെയ്ഡിൽ ലഹരി വസ്തുക്കളുമായി മദ്ധ്യവയസ്കൻ പിടിയിൽ. കൊറ്റാളി നായിക്കൻ ഹൗസിൽ എ. നസീർ ആണ് പിടിയിലായത്.
കണ്ണൂർ സിറ്റി അസിസ്റ്റന്റ് കമ്മീഷണർ പിപി സദാനന്ദന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് റെയ്ഡ് സംഘടിപ്പിച്ചത്. തുടർന്ന് കണ്ണൂർ വുമൺസ് കോളേജിന് സമീപം വെച്ച് ടൗൺ ഇൻസ്പെക്ടർ ശ്രീജിത്ത് കൊടേരിയുടെയും എസ്ഐ അരുൺ നാരായണന്റെയും നേതൃത്വത്തിൽ പ്രതിയെ കഞ്ചാവുമായി പിടികൂടുകയായിരുന്നു.
കോളേജിന് പിന്നിൽ പ്രതി താമസിക്കുന്ന വാടക വീട്ടിൽ നിന്നുമാണ് 20 കെയ്സ് കർണാടക മദ്യം, 9 ചാക്ക് നിരോധിത പുകയില ഉൽപ്പന്നങ്ങൾ, കഞ്ചാവ്, മൂന്നു ലക്ഷം രൂപ എന്നിവ കണ്ടെത്തിയത്. മംഗളൂരുവിൽ നിന്നുമാണ് കഞ്ചാവ് എത്തിച്ചത്. കഞ്ചാവിന്റെയും പുകയില ഉൽപ്പന്നങ്ങളുടെയും റീട്ടെയിൽ വിൽപ്പന നടത്തുന്ന ആളാണ് ഇയാളെന്നും പ്രാഥമിക അന്വേഷണത്തിൽ തെളിഞ്ഞതായി പോലീസ് അറിയിച്ചു.
Comments