ലിസ്ബൺ: ക്രിസ്റ്റിയാനോ റൊണാൾഡോ ഖത്തറിലേയ്ക്ക് ലോകപ്പിനെത്തുമോ എന്ന ചോദ്യത്തിന് ഉത്തരമായി. പ്ലേ ഓഫ് ഫൈനലിൽ വടക്കൻ മാസഡോണിയയെ എതിരില്ലാത്ത രണ്ട് ഗോളുകൾക്കാണ് പോർച്ചുഗൽ തോൽപ്പിച്ചത്. തന്റെ 5-ാം ലോകകപ്പിനായി ക്രിസ്റ്റ്യാനോ ഖത്തറിലേയ്ക്ക് എത്തുന്നതും കാത്തിരുന്ന ആരാധകരെ ആവേശത്തിലാക്കിയാണ് പറങ്കിപ്പട മുന്നേറിയത്. ഇറ്റലിയെ അട്ടിമറിച്ച മാസിഡോണിയയുടെ ഒരു മികവും പോർച്ചുഗലിന് മേൽ കണ്ടില്ല.
കളിയുടെ 32-ാം മിനിറ്റിൽ ബോക്സിന് 15 വാര അകലെ നിന്ന് ബ്രൂണോ തൊടുത്ത റോക്കറ്റ് ഷോട്ട് മാസിഡോണിയ ഗോളി മുഴുനീളൻ ശ്രമം നടത്തിയിട്ടും വലയിലെത്തുന്നത് തടയാനായില്ല. 65-ാം മിനിറ്റിൽ മധ്യനിരയിൽ നിന്ന് ഓടിക്കയറിയ ബ്രൂണോ തനിക്ക് അതിമനോഹരമായി ലഭിച്ച പാസിനെ നിലംതൊടാതെ വലയിലേയ്ക്ക് തിരിച്ച് വിടുകയാണ് ചെയ്തത്.
ലോകറാങ്കിംഗിൽ 67-ാം സ്ഥാനം മാത്രമുള്ള വടക്കൻ മാസിഡോണിയ ഇത്തവണ ഗ്രൂപ്പ് ജെയിൽ രണ്ട് മുൻ ലോകചാമ്പ്യന്മാരെ അട്ടിമറിച്ചാണ് പ്ലേ ഓഫ് ഫൈനലിലേയ്ക്ക് എത്തിയത്. ഗ്രൂപ്പിൽ ആദ്യം ജർമ്മനിയേയും പിന്നീട് ഇറ്റലിയേയും തോൽപ്പിച്ചതിനാൽ പോർച്ചുഗലിനെതിരേയും അട്ടിമറി ആവർത്തിക്കുമോ എന്നതാണ് ഫുട്ബോൾ ലോകം കാത്തിരുന്നത്.
