ലക്നൗ : കാശിനാഥന് മുൻപിൽ തൊഴുതുവണങ്ങി നേപ്പാൾ പ്രധാനമന്ത്രി ഷേർ ബഹാദൂർ ദ്യൂബ. ഉത്തർപ്രദേശ് മുഖ്യമന്ത്രി യോഗി ആദിത്യനാഥിനൊപ്പമായിരുന്നു അദ്ദേഹം കാശിവിശ്വനാഥ ക്ഷേത്രത്തിൽ ദർശനം നടത്തിയത്. കാശിയ്ക്ക് പുറമേ കാല ഭൈരവ ക്ഷേത്രത്തിലും അദ്ദേഹം ദർശനം നടത്തി.
ഉച്ചയോടെയായിരുന്നു യോഗി ആദിത്യനാഥും, ദ്യൂബയും കാശിയിൽ എത്തിയത്. പ്രാർത്ഥനയ്ക്ക് ശേഷം പ്രത്യേക പൂജകളിലും ഇരുവരും പങ്കുചേർന്നു. ശിവഭഗവാന് വഴിപാടുകൾ കഴിച്ച ശേഷമായിരുന്നു നേപ്പാൾ പ്രധാനമന്ത്രിയും യോഗിയും ക്ഷേത്രത്തിൽ നിന്നും മടങ്ങിയത്.
ഇതിന് ശേഷം ഗംഗാ ഘട്ടുകളും, ശ്രീ സാമ്രാജ്യേശ്വർ പശുപതിനാഥ് മഹാദേവ ക്ഷേത്രവും അദ്ദേഹം സന്ദർശിച്ചു. ഇതിന്റെ ചിത്രങ്ങൾ ദ്യൂബേ ഔദ്യോഗിക ട്വിറ്റർ അക്കൗണ്ടിൽ പങ്കുവെച്ചിട്ടുണ്ട്.
മൂന്ന് ദിവസത്തെ ഇന്ത്യ സന്ദർശനത്തിന് വേണ്ടിയാണ് ദ്യൂബെ ഇന്ത്യയിൽ എത്തിയത്. വെള്ളിയാഴ്ച ഡൽഹിയിൽ എത്തിയ അദ്ദേഹം പ്രധാനമന്ത്രി നരേന്ദ്ര മോദിയുമായും മറ്റ് കേന്ദ്രമന്ത്രിമാരുമായും കൂടിക്കാഴ്ച നടത്തിയിരുന്നു. വിവിധ പരിപാടികളിൽ ഉൾപ്പെടെ പങ്കെടുത്തതിന് ശേഷം ഞായറാഴ്ച രാവിലെയാണ് ദ്യൂബെ വാരാണസിയിൽ എത്തിയത്. ലാൽബഹദൂർ ശാസ്ത്രി വിമാനത്താവളത്തിൽ എത്തിയ അദ്ദേഹത്തെ യോഗി ആദിത്യനാഥാണ് സ്വീകരിച്ചത്. ക്ഷേത്ര ഇടനാഴിയുടെ ഉദ്ഘാടനത്തിന് ശേഷം ആദ്യമായാണ് ഒരു ലോകനേതാവ് കാശിയിൽ എത്തുന്നത്.
