ന്യൂഡൽഹി: ഇന്ത്യയിൽ ഓൺലൈൻ കച്ചവടസ്ഥാപനങ്ങളിൽ നിന്നും വാങ്ങുന്ന സാധനങ്ങളുടെ വില ഉടൻ കുത്തനെ കൂടിയേക്കാമെന്ന് റിപ്പോർട്ട്. രാജ്യത്ത് ഓൺലൈൻ സ്ഥാപനങ്ങളിൽ നിന്നും വാങ്ങുന്ന സാധനങ്ങൾ എത്തിച്ചു നൽകുന്ന പ്രമുഖസ്ഥാപനങ്ങളെല്ലാം ചാർജ് വർദ്ധിപ്പിക്കുന്നതാണ് ഇതിന് കാരണമായി പറയുന്നത്. കമ്പനികൾ ഡെലിവറി ചാർജ് വർദ്ധിപ്പിക്കുന്നതോടെ ഇത് ഓൺലൈൻ സ്ഥാപനങ്ങളിൽ നിന്നും വാങ്ങുന്ന സാധനങ്ങളുടെ വിലയിൽ ഉടൻ തന്നെ പ്രതിഫലനം ഉണ്ടാക്കുമെന്നാണ് കണക്കു കൂട്ടുന്നത്.
രാജ്യത്തെ പ്രമുഖ ഇ കൊമേഴ്സ് സ്ഥാപനങ്ങൾക്കക്കം സാധനങ്ങൾ എത്തിച്ചുകൊടുക്കുന്നതിൽ പ്രധാനപ്പെട്ട കമ്പനികളിലൊന്നായ ‘ഡെൽഹിവറി’ 30 ശതമാനമാണ് നിരക്ക് വർദ്ധിപ്പിക്കാൻ തീരുമാനിച്ചിരിക്കുന്നത്. വ്യോമ,കരമാർഗം വിതരണം ചെയ്യുന്നതിനുള്ള പുതുക്കിയ നിരക്ക് ഏപ്രിൽ ഒന്ന് മുതൽ നിലവിൽ വന്നു എന്ന് കമ്പനി പറയുന്നു.
ഓൺലൈൻ സ്ഥാപനങ്ങൾക്ക് വരുന്ന ഈ അധിക ചിലവ് കമ്പനികൾ വഹിക്കാതെ ഉപഭോക്താവിൽ നിന്ന് ഇടാക്കാനാണ് ആമസോൺ അടക്കമുള്ള കമ്പനികളുടെ നീക്കം. ചെലവ് വർദ്ധനയെ സംബന്ധിച്ചുള്ള സന്ദേശമൊന്നും കമ്പനികൾ സെല്ലർമാർക്ക് നൽകിയിട്ടില്ല എന്നതും അധികമായി വരുന്ന ഈ ചെലവ് ഉപഭോക്താവിൽ നിന്ന് ഈടാക്കാനാണ് കമ്പനികളുടെ നീക്കം എന്നതിലേക്ക് വിരൽ ചൂണ്ടുന്നു.
Comments