കീവ്: റഷ്യൻ അധിനിവേശം യുക്രെയ്നിൽ ശക്തമായിരിക്കുകയാണ്. യുദ്ധത്തിൽ തകർന്ന യുക്രെയ്നിൽ നിന്ന് ഭയാനകമായ വാർത്തകളാണ് പുറത്തുവരുന്നത്. ദശലക്ഷക്കണക്കിന് ആളുകൾ പലായനം ചെയ്യപ്പെട്ടു. വീടുകൾ തകർന്നടിഞ്ഞു. ഉറ്റവരേയും ഉടയവരേയും നഷ്ടമായി.. നാശങ്ങളുടെ കണക്കുകൾ ഏറെയാണ്. ഈ പ്രതിസന്ധികൾക്കിടയിൽ യുക്രെയ്ൻ ജനങ്ങൾക്ക് പ്രതീക്ഷ നൽകുന്നതാണ് പ്രസിഡന്റ് വൊളോഡിമിർ സെലൻസ്കിയുടെ പ്രവർത്തനങ്ങൾ.
റഷ്യൻ അധിനിവേശം ആരംഭിച്ചതിന് പിന്നാലെയാണ് ആഗോള തലത്തിൽ, സാധാരണക്കാർക്ക് വരെ സെലൻസ്കിയെ മനസിലായി തുടങ്ങിയത്. ഇപ്പോഴിതാ അദ്ദേഹത്തിന്റെ വസ്ത്രങ്ങളും സോഷ്യൽ മീഡിയയിൽ വൈറലായിരിക്കുകയാണ്. ‘സെലൻസ്കി മോഡൽ വസ്ത്രം വേണോ’ എന്ന് കുറിച്ച് മാദ്ധ്യമ പ്രവർത്തകൻ ഗ്ലെൻ കേറ്റ്സാണ് വിവരം പങ്കുവെച്ചിരിക്കുന്നത്. ഗ്ലെൻസിന്റെ ട്വീറ്റ് സോഷ്യൽ മീഡിയയിൽ വൈറലാവുകയും ചെയ്തു.
സെലൻസ്കിയുടെ വസ്ത്രം ലിസ്റ്റ് ചെയ്തും അതിന്റെ വില ഒപ്പം ചേർത്തുമാണ് ഗ്ലെൻ എത്തിയത്. സെലൻസ്കിയുടെ ജാക്കറ്റിന് 386 യുക്രെയ്നിയൻ ഹ്രിവ്നിയ അല്ലെങ്കിൽ ഏകദേശം 996 രൂപയാണ് കാണിക്കുന്നത്. പാന്റും ടി ഷർട്ടും 1010, 200 യുക്രെയ്നിയൻ ഹ്രിവ്നിയയ്ക്കാണ് വിൽക്കുന്നത്. ഒരാൾക്ക് ഏകദേശം 5056 രൂപയുണ്ടെങ്കിൽ സെലൻസ്കിയുടെ വസ്ത്രത്തിന് സമാനമായവ സ്വന്തമാക്കാമെന്നാണ് ഗ്ലെൻ പറയുന്നത്.
ഗ്ലെന്നിന്റെ ട്വീറ്റ് വൈറലായതിന് പിന്നാലെ നിരവധി കമന്റുകളാണ് ലഭിക്കുന്നത്. ‘സെലൻസ്കി എപ്പോഴും ഈ വസ്ത്രം തന്നെയാണ് ധരിച്ചിരിക്കുന്നത്. ഈ നിറത്തിലുള്ള വസ്ത്രത്തിന് എന്തെങ്കിലും പ്രതീകാത്മക കാരണം ഉണ്ടോ’ എന്നാണ് ഒരാൾ കുറിച്ചിരിക്കുന്നത്. സെലൻസ്കി എപ്പോഴും ഹീറോ ആണെന്ന് മറ്റൊരാളും ട്വിറ്ററിൽ കുറിച്ചിരിക്കുന്നു.
The Zelensky collection (shared on TG) pic.twitter.com/rWO41xXGTy
— Glenn Kates (@gkates) April 9, 2022
