”കൊറോണ വൈറസിന്റെ പുതിയ വകഭേദം കണ്ടെത്തി. അയ്യോ ഇനിയും വൈറസോ…”വൈറസ് എന്ന് കേൾക്കുമ്പോൾ എല്ലാവരുടേയും മനസ്സിൽ ഇപ്പോൾ ആശങ്കയാണ്. മഹാമാരി ജനങ്ങളുടെ ഇടയിൽ വരുത്തിയ ആഘാതം അത്രമാത്രം വലുതാണ്. ലോക്ഡൗണും അടച്ചിടലും കാരണം മാസങ്ങളോളം ആരും വീടുകളിൽ നിന്നും പുറത്തിറങ്ങാതിരുന്നു. ജോലി നഷ്ടപ്പെട്ട് ആളുകൾ അലഞ്ഞ് തിരിഞ്ഞു. എന്തിനേറെ ഉറ്റവരെ അവസാനമായി ഒരു നോക്ക് കാണാൻ പോലും പലർക്കും സാധിച്ചില്ല. ഇങ്ങനെയെല്ലാം മനുഷ്യനെ കഷ്ടപ്പെടുത്തിയ മഹാമാരിയിൽ നിന്ന് ലോകം കരകയറുന്നതേയുള്ളൂ. അതിനിടെയാണ് ഗവേഷകർ പുതിയ കണ്ടെത്തലുമായി എത്തിയിരിക്കുന്നത്. ഒന്നല്ല, അയ്യായിരം വൈറസുകളെയാണ് ഗവേഷകർ പുതുതായി കണ്ടെത്തിയത്. മനുഷ്യരാശിയെ മുഴുവനായി തകർക്കാൻ സാധിക്കുന്ന ഈ വൈറസുകൾ സമുദ്രത്തിൽ വ്യാപകമായി വിഹരിക്കുന്നുണ്ടെന്നാണ് റിപ്പോർട്ടുകൾ.
ലോകത്തിന്റെ വിവിധ ഭാഗങ്ങളിലായി നിരവധി അപകടകാരികളായ വൈറസുകളെ കണ്ടെത്തിയിട്ടുണ്ടെങ്കിലും അതിൽ മിക്കതും മനുഷ്യനെ ബാധിക്കാറില്ല. എന്നാൽ ഇപ്പോൾ കണ്ടെത്തിയ വൈറസുകൾ മനുഷ്യരെ വ്യാപകമായി ബാധിക്കുമെന്നാണ് പഠനങ്ങൾ തെളിയിക്കുന്നത്. മനുഷ്യരിലെ അസുഖങ്ങൾക്ക് കാരണമാവുന്ന ആർഎൻഎ വൈറസുകളുടെ വിഭാഗത്തിൽ പെടുന്നവയാണ് ഇവ. ജലദോഷം മുതൽ കൊറോണ വരെ ഈ വൈറസ് ബാധ മൂലം ഉണ്ടാകാൻ സാദ്ധ്യതയുണ്ട്. മനുഷ്യരെ കൂടാതെ മൃഗങ്ങളെയും ചെടികളെയും ഇത് ബാധിക്കുന്നുണ്ട്. ഈ വൈറസുകൾ തമ്മിൽ വേർതിരിച്ചറിയാൻ സാധിക്കില്ല എന്നതാണ് മറ്റൊരു പ്രശ്നം.
സമുദ്രത്തിൽ കണ്ടെത്തിയ ആർഎൻഎ വൈറസുകൾ കേന്ദ്രീകരിച്ചിരിക്കുന്നത് ചെറിയജീവികളായ പ്ലാങ്ക്തണുകളിലാണ്. സമുദ്രജീവികളുടെ ഭക്ഷ്യ ശൃഖലയുടെ ആദ്യ കണ്ണിയായി കണക്കാക്കുന്ന പ്ലാങ്ക്തണുകൾക്ക് വെള്ളത്തിൽ പൊങ്ങിക്കിടക്കാനും ഒഴുക്കിനെതിരെ നീന്താനും ശേഷിയുണ്ട്. ഈ പ്ലാങ്ക്തണുകളുടെ കൂട്ടത്തിലാണ് വൈറസുകളെ കണ്ടെത്തിയിരിക്കുന്നത്.
ഗവേഷകർ നടത്തിയ പരീക്ഷണത്തിൽ 5504 വൈറസുകളെ കണ്ടെത്തിയിട്ടുണ്ട്. ആർട്ടിഫിഷ്യൽ ഇന്റലിജൻസിന്റെ സഹായത്തോടെ ആർഎൻഎ ഘടകം മസ്സിലാക്കി ഇവയുടെ സാമ്യവും അന്തരവും തിരിച്ചറിഞ്ഞ് വൈറസുകളുടെ എണ്ണം തിട്ടപ്പെടുത്തി. ലോകത്തെ എല്ലാ സമുദ്രങ്ങളിലും ഈ വൈറസുകളുടെ സാന്നിദ്ധ്യം ഉണ്ടെന്നാണ് ഗവേഷകർ പറയുന്നത്. പടിഞ്ഞാറൻ പസിഫിക്കിലും, അൻറാർട്ടിക് മേഖലകളിലും മാത്രമാണ് ഇവയുടെ കുറവ് കണ്ടെത്തിയിരിക്കുന്നത്.
ഭൂമിയിൽ ജീവൻ ഉത്ഭവിച്ച സമയത്ത് തന്നെ വൈറസ് ബാക്ടീരിയ പോലുള്ള സൂക്ഷ്മജീവികളുടെ സാന്നിദ്ധ്യവും ഇവിടെയുണ്ട്. ഇവ സ്വയം നിലനിൽക്കുന്നതിനോടൊപ്പം മറ്റ് ജീവജാലങ്ങളുടെ ശരീരത്തിൽ പ്രവേശിച്ച് അവയെ നിലനിർത്തുകയോ തകർക്കുകയോ ചെയ്യുന്നു. ഭൂമിയിൽ ഇന്ന് കാണുന്ന ജൈവവൈവിദ്ധ്യത്തിൽ വൈറസുകളുടെ പങ്ക് നിർണായകമാണ്. എന്നാൽ ചില സമയങ്ങളിൽ ഇത് മനുഷ്യന് വെല്ലുവിളിയാകും. മനുഷ്യ ശരീരത്തിൽ പ്രവേശിച്ചാൽ സ്വയം ജനിതക മാറ്റത്തിന് വിധേയമാകാൻ ഇവയ്ക്ക് സാധിക്കും. ഇത്തരത്തിൽ പലതരം രോഗങ്ങൾ പകർത്താനുള്ള ശേഷിയും ഈ വൈറസുകൾക്കുണ്ട്. അതുകൊണ്ട് തന്നെ വൈറസുകളെപ്പറ്റിയുള്ള പഠനം ഭാവിയിൽ വരാനിരിക്കുന്ന മഹാമാരികളെ ഇല്ലാതാക്കാൻ സഹായിക്കുമെന്നാണ് നിഗമനം.
