മുംബൈ: ഐപിഎല്ലിൽ ആദ്യ ജയം തേടി ഇറങ്ങുന്ന നിലവിലെ ചാമ്പ്യന്മാരായ ചെന്നൈ സൂപ്പർ കിംഗ്സിന് ഇന്ന് എതിരാളി റോയൽ ചലഞ്ചേഴ്സ് ബാംഗ്ലൂർ. പരിശീലനത്തിനിടെ ടീം ഇന്ത്യയുടെ കരുത്തന്മാരായ വിരാട് കോഹ്ലിയും രവീന്ദ്രജഡേജയും സൗഹൃദം പങ്കിടുന്ന വീഡിയോ ഇരുടീമുകളുടേയും ആരാധകർ ആവേശത്തോടെയാണ് പങ്കുവെച്ചത്.
ഇത്തവണ ബംഗ്ലൂരുവിന്റെ നായക പട്ടം വിട്ടൊഴിഞ്ഞ വിരാട് കോഹ്ലിയും അപ്രതീക്ഷി തമായി മഹേന്ദ്ര സിംഗ് ധോണി പിന്മാറിയതോടെ നായകപട്ടം ലഭിച്ച രവീന്ദ്രജഡേജയും നേർക്കുനേർ പോരാടുമ്പോൾ ചെന്നൈയ്ക്ക് ഇന്ന് ജയം അനിവാര്യമാണ്.
നവി മുംബൈയിലെ ഡോ. ഡി വൈ പാട്ടീൽ സ്റ്റേഡിയത്തിലാണ് ഇന്നത്തെ മത്സരം അരങ്ങേറുന്നത്. ഫാ ഡ്യൂപ്ലെസിസിന്റെ നേതൃത്വത്തിൽ ബാംഗ്ലൂർ ടീം ഇറങ്ങുമ്പോൾ 2011 മുതൽ 2021 വരെ ഡ്യൂപ്ലെസിസ് ചെന്നൈയുടെ താരമായിരുന്നു എന്ന പ്രത്യേകതയുമുണ്ട്.
ഇത്തവണ ചെന്നൈ കൈവിട്ടതോടെ 7 കോടി രൂപയ്ക്കാണ് ബാംഗ്ലൂർ ഡ്യൂപ്ലെസിസിനെ സ്വന്തമാക്കിയത്. കളിച്ച നാലിൽ മൂന്നിൽ ബാംഗ്ലൂർ ജയിച്ചപ്പോൾ നാലിലും തോറ്റ ചെന്നൈയ്ക്ക് ഇന്ന് നിർണ്ണായകമാണ്.
