കൊച്ചി: അന്തരിച്ച പ്രശസ്ത തിരക്കഥാകൃത്ത് ജോൺ പോളിന് യാത്രാ മൊഴി നൽകി മഞ്ജു വാര്യർ. ജോൺപോളിനെ അവസാനമായി ആശുപത്രിയിൽ പോയി കണ്ട ഓർമ്മകൾ പങ്കുവെച്ചിരിക്കുകയാണ് നടി.
യാത്ര..മിഴിനീർപൂവുകൾ,ഇനിയും കഥ തുടരും,വിടപറയും മുമ്പേ…ഞാൻ ഞാൻ മാത്രം..ഈ നിമിഷത്തിന് തലവാചകമായേക്കാവുന്ന എത്രയോ സിനിമകൾ!
കുറച്ചുദിവസം മുമ്പ് ജോൺപോൾ സാറിനെ ആശുപത്രിയിൽ പോയി കണ്ടിരുന്നു. എന്നെ കാണണമെന്ന് അദ്ദേഹം ആഗ്രഹം പ്രകടിപ്പിച്ചതറിഞ്ഞായിരുന്നു അത്. ആരോഗ്യത്തോടെ തിരിച്ചുവരുമെന്നും ഒരുമിച്ച് ഒരു സിനിമ ചെയ്യണമെന്നുമാണ് അദ്ദേഹം പറഞ്ഞത്. അവശതകൾക്കപ്പുറമുള്ള കരളുറപ്പുണ്ടായിരുന്നു ആ വാക്കുകൾക്ക്. അത് സത്യമാകുമെന്നുതന്നെയാണ് അല്പം മുമ്പുവരെ ഞാനും വിശ്വസിച്ചിരുന്നത്.യാത്രാമൊഴി. എന്ന് നടി ഫേസ്ബുക്കിൽ കുറിച്ചു.
മഞ്ജു വാര്യരുമായി ഏറെ വ്യക്തി ബന്ധവും അടുപ്പവും ജോൺ പോൾ നിലനിർത്തിയിരുന്നു. പലപ്പോഴും മഞ്ജുവിന്റെ അഭിനയ മികവിനെ പ്രശംസിക്കാനും തുറന്ന് പറയാനും ജോൺ പോൾ മടിച്ചിരുന്നില്ല.
കൊച്ചിയിലെ സ്വകാര്യ ആശുപത്രിയിൽ ചികിത്സയിൽ കഴിയുന്നതിനിടെ ഇന്ന് ഉച്ചയോടെയാണ് ജോൺ പോൾ അന്തരിച്ചത്.71 വയസായിരുന്നു. ശ്വാസ തടസ്സവും അനുബന്ധ രോഗങ്ങളുമായി കഴിഞ്ഞ രണ്ടു മാസത്തോളമായി ഗുരുതരാവസ്ഥയിൽ കഴിയുകയായിരുന്നു അദ്ദേഹം.
Comments