ബഹിരാകാശ നിലയങ്ങളിൽ വെള്ളം ഒഴുകി നടക്കുന്ന ദൃശ്യങ്ങൾ പലപ്പോഴും നാം കണ്ടിരിക്കാം. ഗുരുത്വാകർഷണമില്ലാത്തതിനാൽ ബബിളുകൾക്ക് സമാനമായാണ് വെളളം ഒഴുകി നടക്കുക. എന്നാൽ വെള്ളത്തിൽ മുക്കിയ ഒരു ടവ്വൽ ബഹിരാകാശത്ത് പിഴിഞ്ഞെടുക്കുന്ന ദൃശ്യങ്ങൾ നിങ്ങൾ കണ്ടിട്ടുണ്ടോ..
ട്വിറ്ററിൽ ഇപ്പോൾ തരംഗമായിക്കൊണ്ടിരിക്കുന്ന ബഹിരാകാശ വീഡിയോയാണിത്. കമാൻഡർ ക്രിസ് ഹാഡ്ഫീൽഡാണ് ദൃശ്യങ്ങളിലുള്ളത്. കാനേഡിയൻ ബഹിരാകാശ ഏജൻസിയാണ് ദൃശ്യങ്ങൾ ആദ്യം യൂട്യൂബിൽ പങ്കുവെച്ചതെങ്കിലും പിന്നീട് വെള്ളം പിഴിയുന്ന ഭാഗങ്ങൾ ട്വിറ്റർ ഏറ്റെടുക്കുകയായിരുന്നു.
Wringing out a wet towel in space…
Uzayda ıslak bir havlunun suyunu sıkmak…
— Tansu YEĞEN (@TansuYegen) April 28, 2022
ബഹിരാകാശ നിലയങ്ങൾക്ക് വേണ്ടി പ്രത്യേകം രൂപകൽപന ചെയ്ത ഹോക്കി-പക്കിൽ നിന്ന് ഒരു തുണിയെടുക്കുകയും അതിൽ വെള്ളം ഒഴിച്ച് കുതിർക്കുകയുമാണ് ആദ്യം ഹാഡ്ഫീൽഡ് ചെയ്യുന്നത്. തുടർന്ന് തുണി പിഴിഞ്ഞ് വെള്ളം പുറത്തുകളയാൻ വേണ്ടി പരിശ്രമിക്കുകയാണ് ഹാഡ്ഫീൽഡ്.
എന്നാൽ ശക്തമായ പരിശ്രമങ്ങൾക്ക് ഒടുവിലും തുണിയിലെ ഒരു തുള്ളി വെള്ളം പോലും പിഴിഞ്ഞ് പുറത്തേക്ക് കളയാൻ അദ്ദേഹത്തിന് സാധിക്കുന്നില്ല. തുണിയിൽ നിന്നും ജലാംശം പുറത്തേക്ക് വരുന്നുണ്ടെങ്കിലും വസ്ത്രത്തിന്റെ പ്രതലത്തിൽ നിന്നും വെള്ളം പുറത്തേക്ക് ഒഴുകാതിരിക്കുന്നത് ദൃശ്യങ്ങളിൽ കാണാം.
പൂജ്യം ഗ്രാവിറ്റിയിൽ നിന്നുകൊണ്ടാണ് ഹാഡ്ഫീൽഡ് തുണി പിഴിയാൻ ശ്രമിക്കുന്നത്. അതുകൊണ്ട് തന്നെ ജലതന്മാത്രകൾ ഒന്നിച്ച് തുണിയിൽ നിന്ന് വിട്ടുപോരാതെ ‘ജെൽ’ രൂപത്തിലാകുകയായിരുന്നു.
ലിക്വിഡ് ജെല്ലുപോലെ വെള്ളം ടവ്വലിനെ ആവരണം ചെയ്യുന്ന ദൃശ്യങ്ങൾ വളരെ വേഗത്തിലാണ് ട്വിറ്റർ കീഴടക്കിയത്. 28 സെക്കൻഡ് മാത്രം ദൈർഘ്യമുള്ള വീഡിയോ ഒറ്റദിവസം കൊണ്ട് തന്നെ ലക്ഷക്കണക്കിന് പേർ കണ്ടുകഴിഞ്ഞു.
