ന്യൂഡൽഹി : വിദേശരാജ്യങ്ങളിലെ നൈറ്റ് ക്ലബ് പാർട്ടിയിൽ പങ്കെടുത്ത് തിരികെ രാജ്യത്തെത്തിയിരിക്കുകയാണ് കോൺഗ്രസ് നേതാവ് രാഹുൽ ഗാന്ധി. തെലങ്കാനയിലെ റാലിയിൽ പ്രസംഗിച്ചുകൊണ്ടാണ് രാഹുൽ തന്റെ വരവറിയിച്ചത്. എന്നാൽ പ്രസംഗത്തിന് മുൻപ് താൻ എന്താണ് സംസാരിക്കേണ്ടത് എന്ന് മറ്റ് നേതാക്കളോട് ചോദിക്കുന്ന രാഹുലിന്റെ വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. ബിജെപി നേതാവ് അമിത് മാളവ്യയാണ് ഈ വീഡിയോ ട്വിറ്ററിൽ പങ്കുവെച്ചത്. നൈറ്റ് ക്ലബ്ബിലെ വീഡിയോയ്ക്ക് പിന്നാലെയാണ് ഈ വീഡിയോയും പ്രചരിക്കുന്നത്.
തെലങ്കാനയിലെ കർഷകരെ അഭിസംബോധന ചെയ്യുന്നതിന് മുമ്പ് കോൺഗ്രസ് നേതാക്കളുമായി നടത്തിയ കൂടിക്കാഴ്ചയ്ക്കിടെയാണ് താൻ എന്താണ് സംസാരിക്കേണ്ടതെന്ന് രാഹുൽ ഗാന്ധി ചോദിച്ചത്. ഇന്നത്തെ പ്രധാന വിഷയം എന്താണെന്നും താൻ എന്താണ് ജനങ്ങളോട് പറയേണ്ടത് എന്നും രാഹുൽ ചോദിക്കുന്നത് വീഡിയോയിലുണ്ട്. വിദേശയാത്രകൾക്കും നൈറ്റ് ക്ലബ് പാർട്ടികൾക്കുമിടയിൽ രാഷ്ട്രീയ പ്രവർത്തനം നടത്തിയാൽ ഇതാകും അവസ്ഥ എന്ന് രാഹുലിനെ പരിഹസിച്ചുകൊണ്ട് അമിത മാളവ്യ കുറിച്ചു.
എന്നും നീഗൂഢത നിറഞ്ഞ രാഹുലിന്റെ വിദേശ യാത്രകളുടെ യഥാർത്ഥ ദൃശ്യങ്ങൾ പുറത്ത് വന്നതോടെ കോൺഗ്രസ് പ്രതിരോധത്തിലായിരിക്കുകയാണ്. രാജ്യത്ത് പ്രശ്നങ്ങൾ നടക്കുമ്പോഴാണ് കോൺഗ്രസ് നേതാവ് എന്ന് അവകാശപ്പെടുന്ന രാഹുൽ വിദേശരാജ്യങ്ങളിൽ കറങ്ങി നടക്കുന്നത് എന്ന ആരോപണങ്ങളാണ് ഉയരുന്നത്.
