ബംഗളൂരു : കോൺഗ്രസിൽ നിന്ന് രാജിവെച്ച കർണാടക മുൻ മന്ത്രി ബിജെപിയിൽ ചേർന്നു. കെപിസിസി വൈസ് പ്രസിഡന്റായി പുതുതായി നിയമിക്കപ്പെട്ട പ്രമോദ് മധ്വരാജ് ആണ് ബിജെപി അംഗത്വം സ്വീകരിച്ചത്. കോൺഗ്രസിൽ നിന്ന് രാജിവെച്ച് മണിക്കൂറുകൾക്കകം അദ്ദേഹം ബിജെപിയിൽ എത്തുകയായിരുന്നു.
പ്രമോദ് മധ്വരാജിനൊപ്പം പാർട്ടിയിലെ നിരവധി മുതിർന്ന നേതാക്കളും പാർട്ടിയിലെത്തി. മുൻ എംഎൽസി സന്ദേശ് നാഗരാജ്, മുൻ മന്ത്രി വർത്തൂർ പ്രകാശ്, മുൻ എംപി കെബി കൃഷ്ണമൂർത്തി, മുൻ എംഎൽഎ മഞ്ജുനാഥ് ഗൗഡ, മുൻ ഐആർഎസ് ഉദ്യോഗസ്ഥ ലക്ഷ്മി അശ്വിൻഗൗഡ, മാണ്ഡ്യയിൽ നിന്നുള്ള കോൺഗ്രസ് നേതാവ് അശോക് ജയറാം എന്നിവരാണ് ബിജെപി അംഗത്വം സ്വീകരിച്ചത്.
കോൺഗ്രസിനുള്ളിൽ അനുഭവപ്പെടുന്ന സമ്മർദ്ദം കാരണമാണ് താൻ രാജിവെക്കുന്നത് എന്ന് അദ്ദേഹം പറഞ്ഞു. കഴിഞ്ഞ മൂന്ന് വർഷമായി ഉഡുപ്പി ജില്ലയിലെ പാർട്ടിയുടെ പ്രവർത്തനങ്ങളുമായി തനിക്ക് യോജിച്ച് പോകാൻ സാധിക്കുന്നില്ലായിരുന്നു. ഇത് രാഷ്ട്രീയ സമ്മർദ്ദങ്ങൾക്ക് വഴിവെക്കുന്നു. അതിനാൽ പുതുതായി നൽകിയ കെപിസിസി വൈസ് പ്രസിഡന്റ് പദവി ഏറ്റെടുക്കാനാകില്ലെന്നും പാർട്ടിയിൽ നിന്ന് രാജി വെക്കുന്നതായും അദ്ദേഹം അറിയിച്ചു.
Comments