ന്യൂഡൽഹി: സംസ്കൃതം ഉൾപ്പെടെ എട്ട് ഇന്ത്യൻ ഭാഷകൾ പരിഭാഷ സംവിധാനത്തിൽ ഉൾപ്പെടുത്തി ഗൂഗിൾ. പരിഭാഷകളിൽ ഇന്ത്യൻ ബഹുഭാഷാ സേവനം വിപുലീകരിക്കുന്നതിന്റെ ഭാഗമായിട്ടാണ് എട്ട് ഇന്ത്യൻ ഭാഷകൾ കൂടി ഉൾപ്പെടുത്തിയത്. സംസ്കൃതത്തിന് പുറമെ അസമീസ്, ഭോജ്പുരി, ഡോഗ്രി, കൊങ്കണി, മിസോ, മണിപ്പൂരി, മൈഥിലി എന്നിവയാണ് മറ്റ് ഭാഷകൾ. ഇതോടെ ഗൂഗിൾ ട്രാൻസ്ലേറ്ററിൽ ഉപയോഗിക്കാൻ സാധിക്കുന്ന ഇന്ത്യൻ ഭാഷകളുടെ എണ്ണം 19 ആയി.
മൊത്തം 24 ഭാഷളാണ് പുതുതായി ഉൾപ്പെടുത്തിയിരിക്കുന്നത്. ഈ വർഷത്തെ ഗൂഗിൾ ഐ/ഒ ഡെവലപ്പർ കോൺഫറൻസിലാണ് ഇത് അവതരിപ്പിച്ചത്. പുതിയ ഭാഷകൾ കൂടി എത്തിയതോടെ ഗൂഗിൾ ട്രാൻസലേറ്ററിൽ തർജ്ജമ ചെയ്യാൻ സാധിക്കുന്ന ഭാഷകളുടെ എണ്ണം 133 ആയി വർദ്ധിച്ചു. സീറോ ഷോട്ട് മെഷീൻ ട്രാൻസ്ലേഷൻ സംവിധാനം ഉപയോഗിച്ച് ചേർത്ത ആദ്യ ഭാഷകളാണിവ.
‘ഗൂഗിൾ പരിഭാഷയിൽ ഏറ്റവും കൂടുതൽ പേർ ആവശ്യപ്പെടുന്ന ഭാഷ സംസ്കൃതമാണ്, ഒടുവിൽ ഞങ്ങൾ അത് ചേർക്കുന്നു. വടക്കു കിഴക്കൻ ഇന്ത്യൻ ഭാഷകളിൽ ഉൾപ്പെടുത്തുന്ന ആദ്യ ഭാഷയാണ് സംസ്കൃതം. ഈ ഭാഷ മറ്റൊരിടത്തും ഉൾപ്പെടുത്തിയിട്ടില്ല’ എന്നാണ് ഗൂഗിൾ റിസർച്ചിലെ മുതിർന്ന സോഫ്റ്റ്വെയർ എഞ്ചിനീറായ ഐസക് കാസ്വെൽ പറഞ്ഞത്.
ഇന്ത്യൻ ഭരണഘടന അംഗീകരിച്ച 22 ഭാഷകൾ ഉൾപ്പെടുത്താൻ ഗൂഗിളിന് സാധിച്ചിട്ടില്ല. എന്നാൽ ഇത് വൈകാതെ നടപ്പിലാക്കുമെന്നും സാദ്ധ്യതകൾ പരിശോധിച്ച് വരികയാണെന്നും ഐസക് കാസ്വെൽ പറഞ്ഞു. ശബ്ദ വിവർത്തനവും ചിത്രങ്ങളുടെ പരിഭാഷയും വൈകാതെ ലഭ്യമാക്കും. പ്രാദേശിക ഭാഷാ പ്രയോഗങ്ങൾ ഉൾപ്പെടെ പരിഭാഷകളെ മെച്ചപ്പെടുത്താനാണ് ഗൂഗിൾ ശ്രമിക്കുന്നതെന്ന് ഐസക് പറഞ്ഞു.
Comments