ന്യൂഡൽഹി: നാലാമത് ക്വാഡ് ഉച്ചകോടിയിൽ പ്രധാനമന്ത്രി പങ്കെടുക്കും. മെയ് 24ന് ടോക്കിയോയിലാണ് ഉച്ചകോടി. ഇന്ത്യ, ജപ്പാൻ, ഓസ്ട്രേലിയ, അമേരിക്ക എന്നീ രാജ്യങ്ങളാണ് ക്വാഡിലെ അംഗങ്ങൾ.
ഉച്ചകോടി വേളയിൽ അമേരിക്കൻ പ്രസിഡന്റ് ജോ ബൈഡനുമായി മോദി പ്രത്യേക കൂടിക്കാഴ്ച നടത്തും. ജപ്പാൻ പ്രധാനമന്ത്രി ഫുമിയോ കിഷിഡയേയും മോദി കാണും. മെയ് 24ന് തന്നെയാണ് ജപ്പാൻ പ്രധാനമന്ത്രിയെയും യുഎസ് പ്രസിഡന്റിനെയും മോദി കാണുക. ഇതിനിടെ ഓസ്ട്രേലിയൻ പ്രധാനമന്ത്രി സ്കോട്ട് മോറിസണുമായും നരേന്ദ്രമോദി കൂടിക്കാഴ്ച നടത്തിയേക്കും. വിദേശകാര്യ മന്ത്രാലയം നടത്തിയ വാർത്താ സമ്മേളനത്തിലാണ് ഇക്കാര്യം അറിയിച്ചത്.
ക്വാഡ് പ്രതിനിധികളുടെ നാലാമത്തെ ഉച്ചകോടിയാണ് ടോക്കിയോയിൽ നടക്കുന്നത്. ആദ്യത്തെ ഉച്ചകോടി വെർച്വൽ കൂടിക്കാഴ്ചയായിരുന്നു. 2021 മാർച്ചിലായിരുന്നു ഇത് നടന്നത്. ഇന്തോ-പസഫിക്കിന്റെ സുരക്ഷ ഉറപ്പുവരുത്തുന്നതിനായുള്ള വിഷയങ്ങളാണ് ക്വാഡ് ഉച്ചകോടിയിൽ ചർച്ചയാവുക.
