ശ്രീനഗർ: ഒറ്റരാത്രികൊണ്ട് കോടീശ്വരനാകാൻ കഴിയുമോ? ലോട്ടറിയടിച്ചാൽ പറ്റുമല്ലേ.. എന്നാൽ ലോട്ടറിയെടുക്കാതെ ക്രിക്കറ്റ് കളിച്ച് കോടിപതിയായിരിക്കുകയാണ് കശ്മീരിലെ ഒരു യുവാവ്.
ദക്ഷിണ കശ്മീരിലെ അനന്ത്നാഗ് ജില്ലയിലെ ബിജ്ബെഹ്റ സ്വദേശിയായ വസീം രാജയുടെ ജീവിതമാണ് ഒറ്റ രാത്രികൊണ്ട് മാറി മറിഞ്ഞത്. ഓൺലൈനായി ക്രിക്കറ്റ് കളിക്കുന്ന പ്ലാറ്റ്ഫോമായ ഡ്രീം 11-ൽ മത്സരിച്ച വസീം രാജ നേടിയത് രണ്ട് കോടി രൂപയാണ്. ഫാന്റസി ടീമുകളെ തയ്യാറാക്കി ഐപിഎൽ കളിച്ചാണ് വസീം വിജയിയായി മാറിയത്.
ശനിയാഴ്ച രാത്രി സുഖമായി കിടന്നുറങ്ങിയ വസീമിനെ ഞായറാഴ്ച രാവിലെയായപ്പോൾ സുഹൃത്തുക്കൾ ഫോണിൽ വിളിച്ച് അഭിനന്ദിക്കുകയായിരുന്നു. അപ്പോഴാണ് ഡ്രീം 11-ൽ ഒന്നാം സ്ഥാനം നേടിയ വിവരം വസീം അറിയുന്നത്. ഒന്നാമതെത്തുന്നയാൾക്ക് ലഭിക്കുന്നത് രണ്ട് കോടി രൂപയാണെന്ന യാഥാർത്ഥ്യവും വസീം തിരിച്ചറിഞ്ഞു.
കഴിഞ്ഞ രണ്ട് വർഷമായി ഡ്രീം 11-ൽ കളിക്കാറുള്ള വസീമിനെ തുണച്ചത് ഭാഗ്യമാണെന്നാണ് അദ്ദേഹത്തിന്റെ പ്രതികരണം. ഇനി തന്റെ അസുഖബാധിതയായ അമ്മയെ ചികിത്സിക്കാൻ തനിക്ക് കഴിയുമെന്നും ദാരിദ്ര്യം മാറികിട്ടുമെന്നും വസീം പ്രതികരിച്ചു.
ഡ്രീം 11 എന്നത് ഒരു ഫാന്റസി സ്പോർട്സ് പ്ലാറ്റ്ഫോമാണ്. ഉപയോക്താക്കൾക്ക് അവിടെ ഫാന്റസി ക്രിക്കറ്റ്, ഹോക്കി, ഫുട്ബോൾ, കബഡി, ബാസ്കറ്റ്ബോൾ എന്നിവ കളിക്കാം.
