കോഴിക്കോട്: അശാസ്ത്രീയമായി നിർമ്മിച്ച കെഎസ്ആർടിസി ടെർമിനലിൽ വീണ്ടും ബസ് കുടുങ്ങി. കെ സ്വിഫ്റ്റ് ബസാണ് കുടുങ്ങിയത്. ഇന്നലെ ടർമിനലിലെ തൂണുകൾക്കിടയിൽ കുടുങ്ങിയ സ്വിഫ്റ്റ് ബസ് മണിക്കൂറുകൾ നീണ്ട പരിശ്രമത്തിനൊടുവിലാണ് പുറത്തെടുത്തത്. ഇതിന് പിന്നാലെയാണ് വീണ്ടും സമാന സംഭവം.
തൂണുകൾക്കിടയിലാണ് ബസ് കുടുങ്ങിയത്. ഇത് പിന്നീട് പുറത്തെടുത്തു. പുറത്തെടുക്കുന്നതിനിടെ ബസിന്റെ വിൻഡോ ഗ്ലാസുകൾ പൊട്ടി. ഇതേ തുടർന്ന് അറ്റകുറ്റ പണികൾക്കായി ബസ് നടക്കാവിലെ കെഎസ്ആർടിസി റീജിയണൽ വർക്ക് ഷോപ്പിലേക്ക് മാറ്റി.
ബംഗളൂരുവിൽ നിന്നും എത്തിയ കെ സ്വിഫ്റ്റ് ബസാണ് കഴിഞ്ഞ ദിവസം കുടുങ്ങിയത്. തൂണുകളിൽ സുരക്ഷയ്‌ക്കായി സ്ഥാപിച്ച ലോഹ വളയങ്ങൾ മുറിച്ചാണ് ബസ് പുറത്തെടുത്തത്.
