ശ്രീനഗർ: കശ്മീരിലെ പുൽവാമയിൽ നടക്കുന്ന ഏറ്റുമുട്ടലിൽ രണ്ട് ഭീകരരെ വധിച്ചു. ഭീകരരുടെ പക്കൽ നിന്നും ആയുധങ്ങൾ പിടിച്ചെടുത്തു. എകെ റൈഫിൾ ഉൾപ്പെടെ പിടിച്ചെടുത്തതായി കശ്മീർ പോലീസ് വ്യക്തമാക്കി. പുൽവാമയിലെ ഗുണ്ടിപോറ ഏരിയയിലാണ് ഏറ്റുമുട്ടൽ തുടരുന്നത്.
കുൽഗാം പോലീസും സൈന്യവും ചേർന്നാണ് പ്രദേശത്ത് ഏറ്റുമുട്ടൽ തുടരുന്നത്. ഞായറാഴ്ച വൈകിട്ടായിരുന്നു ഏറ്റുമുട്ടൽ ആരംഭിച്ചത്. ഇതിനോടകം 17 മണിക്കൂറുകൾ പിന്നിട്ട ഏറ്റുമുട്ടൽ ശക്തമായി തുടരുകയാണ്.
ഏറ്റുമുട്ടലിൽ നേരത്തെ രണ്ട് ജെയ്ഷെ ഭീകരർ പിടിയിലായിരുന്നു. കോൺസ്റ്റബിൾ റെയാസ് അഹമ്മദിനെ കൊലപ്പെടുത്തിയ ഭീകരൻ ഉൾപ്പെടെയാണ് പുൽവാമയിൽ പിടിയിലായത്. മെയ് 13-നായിരുന്നു ജെയ്ഷെ ഭീകരനായ ആബിദ് ഷാ കശ്മീരിൽ പോലീസുകാരനെ കൊലപ്പെടുത്തിയത്.
Comments