മലപ്പുറം: കരിപ്പൂർ വിമാനത്താവളത്തിൽ വീണ്ടും സ്വർണ വേട്ട. വിദേശത്തു നിന്നും സ്വർണവുമായി എത്തിയ കണ്ണൂർ സ്വദേശിയെ വിമാനത്താവളത്തിൽ നിന്നും പോലീസ് പിടികൂടി. ലക്ഷങ്ങൾ വിലമതിക്കുന്ന സ്വർണവും ഇയാളുടെ പക്കൽ നിന്നും പോലീസ് പിടികൂടിയിട്ടുണ്ട്.
മൈക്രോവേവ് ഓവനിൽ ഒളിപ്പിച്ചായിരുന്നു ഇയാൾ സ്വർണം കടത്താൻ ശ്രമിച്ചത്. ഇതുമായി ബന്ധപ്പെട്ട് പോലീസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തിൽ നടത്തിയ പരിശോധനയിലാണ് സ്വർണം പിടികൂടിയത്.
തലശ്ശേരി പൊന്ന്യം വെസ്റ്റ് സ്വദേശി ഗഫൂറാണ് പോലീസ് പിടിയിലായത്. 1560 ഗ്രാം സ്വർണമാണ് മൈക്രോ വേവ് ഒവനിൽ ഒളിപ്പിച്ച് ഇയാൾ കടത്താൻ ശ്രമിച്ചത്. ദുബായിൽ നിന്നുമാണ് ഇയാൾ എത്തിയതെന്ന് പോലീസ് പറഞ്ഞു. സംഭവത്തിൽ പോലീസ് അന്വേഷണം ആരംഭിച്ചു. ഗഫൂറിനെ കൂടുതൽ ചോദ്യം ചെയ്തുവരികയാണ്.
