മാങ്ങാനയതന്ത്രത്തിലൂടെ സൗഹൃദം ശക്തമാക്കി ബംഗ്ലാദേശ്; രാഷ്‌ട്രപതിക്കും മോദിക്കും ഒരു മെട്രിക് ടൺ ‘അമ്രപാളി’ മാമ്പഴം അയച്ച് ഷെയ്ഖ് ഹസീന

ന്യൂഡൽഹി: രാഷ്‌ട്രപതി രാം നാഥ് കോവിന്ദിനും പ്രധാനമന്ത്രി നരേന്ദ്രമോദിക്കും ഒരു മെട്രിക് ടൺ ‘അമ്രപാളി’ മാമ്പഴം അയച്ച് ബംഗ്ലാദേശ് പ്രധാനമന്ത്രി ഷെയ്ഖ് ഹസീന. കാലങ്ങളായി ബംഗ്ലാദേശും ഇന്ത്യയും തമ്മിൽ തുടരുന്ന മാംഗോ-ഹിൽസ നയതന്ത്രത്തിന്റെ ഭാഗമായിട്ടാണ് ഷെയ്ഖ ഹസീന മാമ്പഴമയച്ചത്.

നയതന്ത്ര ചാനൽ വഴിയാണ് ബംഗ്ലാദേശ് പ്രധാനമന്ത്രി ഇന്ത്യയുടെ രാഷ്‌ട്രപതിക്കും പ്രധാനമന്ത്രിക്കും സമ്മാനം അയച്ചത്. ഇക്കാര്യം പ്രസ്താവനയിലൂടെ അറിയിച്ചത് ബംഗ്ലാദേശ് ഹൈക്കമ്മീഷണറാണ്. കഴിഞ്ഞ വർഷം പശ്ചിമ ബംഗാൾ, ത്രിപുര, അസം സംസ്ഥാനങ്ങളിലെ മുഖ്യമന്ത്രിമാർക്കും പ്രധാനമന്ത്രി ഹസീന മാമ്പഴം സമ്മാനമായി അയച്ചിരുന്നു. ഇപ്പോൾ ബംഗ്ലാദേശിൽ മാമ്പഴത്തിന്റെ ഏറ്റവും നല്ല സീസണാണ്.