പാറ്റ്ന: അഗ്നിപഥിനെതിരായ പ്രതിഷേധങ്ങളുടെ പശ്ചാത്തലത്തിൽ ബിഹാറിൽ ട്രെയിൻ സർവീസുകൾ നിർത്തിവെച്ചു. രാത്രി എട്ട് മണി വരെ സർവീസുകൾ ഉണ്ടായിരിക്കില്ലെന്നാണ് റെയിൽവേ മന്ത്രാലയം നൽകുന്ന അറിയിപ്പ്.
രാത്രി എട്ട് മണിക്കും പുലർച്ചെ നാല് മണിക്കും ഇടയിൽ മാത്രമേ സർവീസുകളുണ്ടാകൂവെന്നും ശേഷിക്കുന്ന സമയം പൂർണമായും സർവീസുകൾ നിർത്തിവെക്കുമെന്നും റെയിൽവേ അറിയിച്ചു. ട്രെയിനുകൾ കത്തിച്ച് പ്രക്ഷോഭകാരികൾ കലാപഭൂമിയാക്കാൻ ശ്രമിക്കുന്നതിന്റെ പശ്ചാത്തലത്തിലാണ് റെയിൽവേയുടെ നീക്കം. ഇതിനോടകം കോടിക്കണക്കിന് രൂപയുടെ നഷ്ടമാണ് റെയിൽവേ മന്ത്രാലയത്തിനുണ്ടായത്.
അഗ്നിപഥ് പദ്ധതി പിൻവലിക്കണമെന്ന് ആവശ്യപ്പെട്ട് നടത്തുന്ന പ്രതിഷേധത്തിന്റെ പേരിൽ പ്രക്ഷോഭകാരികൾ പൊതുമുതൽ നശിപ്പിക്കുകയും ജനജീവിതം സ്തംഭിപ്പിക്കുകയുമാണ്. പദ്ധതിയെക്കുറിച്ച് മനസിലാക്കാതെ നടത്തുന്ന ഇത്തരം പ്രക്ഷോഭങ്ങളിൽ നിന്ന് യുവാക്കൾ പിന്മാറണമെന്നാണ് കര, വ്യോമ, നാവിക സേനാ മേധാവിമാർ ആവശ്യപ്പെട്ടത്.
