തിരുവനന്തപുരം: സംസ്ഥാനത്ത് വീണ്ടും മൂവായിരം കടന്ന് പ്രതിദിന രോഗികൾ. കഴിഞ്ഞ 24 മണിക്കൂറിനിടെ 3,376 പേർക്ക് കൊറോണ സ്ഥിരീകരിച്ചു. തുടർച്ചയായ അഞ്ചാം ദിവസമാണ് മൂവായിരത്തിന് മുകളിൽ രോഗം സ്ഥിരീകരിക്കുന്നത്. ഏറ്റവും കൂടുതൽ രോഗബാധ എറണാകുളത്താണ്. 838 കൊറോണ കേസുകൾ എറണാകുളത്ത് സ്ഥിരീകരിച്ചപ്പോൾ തിരുവനന്തപുരത്ത് 717 പേർക്ക് രോഗം റിപ്പോർട്ട് ചെയ്തു.
സംസ്ഥാനത്തെ കൊറോണ മരണവും വർധിച്ചിട്ടുണ്ട്. 11 കൊറോണ മരണമാണ് കഴിഞ്ഞ 24 മണിക്കൂറിനിടെ റിപ്പോർട്ട് ചെയ്തത്. കോഴിക്കോടും എറണാകുളത്തും മൂന്ന് വീതമാളുകളാണ് കൊറോണ ബാധിച്ച് മരിച്ചത്. കൂടാതെ സംസ്ഥാനത്ത് ഒരു എലിപ്പനി മരണവും സംഭവിച്ചിട്ടുണ്ട്.
അതേസമയം സംസ്ഥാനത്തെ ആരോഗ്യ മേഖലയിലെ ഗവേഷണ പ്രവർത്തനങ്ങൾ ശക്തമാക്കാൻ നിർദേശം നൽകിയതായി ആരോഗ്യമന്ത്രി വീണാ ജോർജ്ജ് അറിയിച്ചു. സംസ്ഥാനത്തെ ക്യാൻസർ സെന്ററുകൾ, മെഡിക്കൽ കോളേജുകൾ, ഐക്കൺസ്, ഇംഹാൻസ്, ആരോഗ്യ സർവകലാശാല എന്നിവിടങ്ങളിൽ പരസ്പര സഹകരണത്തോടെ ഗവേഷണം ശക്തമാക്കും. നിലവിലുള്ള ഗവേഷണ പ്രവർത്തനങ്ങൾ കൂടുതൽ ശക്തമാക്കുന്നതിന് ഒരു മാസത്തിനകം രൂപരേഖ തയ്യാറാക്കുമെന്നും ആരോഗ്യമന്ത്രി പറഞ്ഞു.
Comments