തിരുവനന്തപുരം: കെറെയിൽ വിഷയത്തിൽ മുഖ്യമന്ത്രിയ്ക്ക് പിന്നാലെ മലക്കം മറിഞ്ഞ് മന്ത്രി പി രാജീവും. റെയിൽവേ കേന്ദ്ര ലിസ്റ്റിലാണെന്നത് പ്രാഥമിക പാഠമാണെന്നും കേന്ദ്രത്തിന്റെ അനുമതിയില്ലെങ്കിൽ സിൽവർലൈൻ പദ്ധതിയില്ലെന്നും വ്യവസായ മന്ത്രി പി രാജീവ്. കേന്ദ്രം അനുമതി നൽകിയില്ലെങ്കിൽ പദ്ധതിയുമായി മുന്നോട്ട് പോകുന്നതിൽ തടസങ്ങളുണ്ടാകും. ഇതാണ് മുഖ്യമന്ത്രിയും സൂചിപ്പിച്ചതെന്ന് അദ്ദേഹം കൂട്ടിച്ചേർത്തു.
മാദ്ധ്യമങ്ങൾ വേണ്ടത്ര ശ്രദ്ധിക്കാത്തതാണ് ‘പദ്ധതിയിൽ നിന്ന് പിന്നോട്ട് പോകുന്നുവോ ‘ എന്ന തരത്തിലുള്ള ചോദ്യങ്ങൾ ഉയരുന്നതിന് കാരണമെന്ന് മന്ത്രി കുറ്റപ്പെടുത്തി.
കഴിഞ്ഞ ദിവസം മുഖ്യമന്ത്രി പിണറായി വിജയനും കേന്ദ്രാനുമതി ലഭിക്കാതെ കെ റെയിൽ പദ്ധതിയുമായി മുന്നോട്ട് പോകാനാവില്ലെന്ന് പറഞ്ഞിരുന്നു. ഇതിന് പിന്നാലെയാണ് മന്ത്രിയും കേന്ദ്രാനുമതി ലഭിച്ചാൽ മാത്രമേ പദ്ധതിയുമായി മുന്നോട്ട് പോകാനാവൂ എന്ന നിലപാട് എടുത്തത്.
എന്തുവന്നാലും പദ്ധതി നടപ്പാക്കുമെന്ന് ആവർത്തിച്ചിരുന്ന സംസ്ഥാന സർക്കാർ തൃക്കാക്കര തിരഞ്ഞെടുപ്പ് ഫലവും നിലവിലെ രാഷ്ട്രീയ സാഹചര്യങ്ങളും കാരണമാവാം, പദ്ധതിയ്ക്കെതിരെ പരസ്യമായി നിലപാട് തിരുത്തുന്നതിന് കാരണമായതെന്നാണ് വിലയിരുത്തൽ.
Comments