ഇസ്ലാമാബാദ്: പാകിസ്താനിൽ ഊർജ്ജ പ്രതിസന്ധി രൂക്ഷം. പ്രശ്നം മറികടക്കാൻ പഞ്ചാബിലെ ലാഹോറിൽ ലോക്ഡൗൺ ഏർപ്പെടുത്തി. പഞ്ചാബ് പ്രവിശ്യാ ഭരണകൂടത്തിന്റേതാണ് തീരുമാനം.
പ്രവിശ്യയുടെ തലസ്ഥാനമായ ലാഹോറിൽ ഇനി മുതൽ എല്ലാ ഞായറാഴ്ചയും സമ്പൂർണ ലോക്ഡൗൺ ആയിരിക്കും. ഞായറാഴ്ച അവശ്യസേവനങ്ങൾ ഒഴികെ ബാക്കിയൊന്നും അനുവദിക്കില്ലെന്ന് ഭരണകൂടം അറിയിച്ചു. സർക്കാർ- സർക്കാർ ഇതര സ്ഥാപനങ്ങളുടെ പ്രവർത്തിദിനം അഞ്ചായി കുറച്ചു. ഇതിൽ എല്ലാ വെള്ളിയാഴ്ചയും ജീവനക്കാർക്ക് വർക്ക് ഫ്രം ഹോം ആണ്. കച്ചവട സ്ഥാപനങ്ങളുടെ പ്രവർത്തി സമയം രാത്രി വരെയായി നിജപ്പെടുത്തി.
ഞായറാഴ്ചകളിൽ ഷോപ്പിംഗ് മാളുകൾ, കടകൾ,ഗോഡൗൺ, വെയർഹൗസ് തുടങ്ങി ഒന്നും പ്രവർത്തിപ്പിക്കരുതെന്നാണ് അധികൃതരുടെ നിർദ്ദേശം. ലോക്ഡൗൺ ഏർപ്പെടുത്തുന്നതോടെ ഊർജ്ജത്തിന്റെ ഉപഭോഗം കുറയ്ക്കാൻ സാധിക്കുമെന്നാണ് ഭരണകൂടത്തിന്റെ പ്രതീക്ഷ.
നിലവിൽ പാകിസ്താൻ കടുത്ത വൈദ്യുതി- ഊർജ്ജ പ്രതിസന്ധിയാണ് നേരിടുന്നത്. 12 മുതൽ 16വരെ പവർകട്ട് ഏർപ്പെടുത്തിയാണ് പാക് സർക്കാർ വൈദ്യുതി പ്രതിസന്ധി നേരിടാൻ ശ്രമിക്കുന്നത്.
Comments