മുംബൈ: രാജ്യത്തെ ഇലക്ട്രിക് വാഹനങ്ങളിലെ ജനപ്രിയ ബ്രാൻഡായ ടാറ്റ നെക്‌സണിന്റെ ഇലക്ട്രിക് കാറിന് തീപിടിച്ചു. മുംബൈയിലെ വെസ്റ്റ് വസായ് മേഖലയിലാണ് സംഭവം. ഒരു റെസ്റ്ററന്റിന് മുൻപിൽ പാർക്ക് ചെയ്തിരുന്ന വാഹനത്തിൽ തീപിടിക്കുന്നത് ദൃശ്യങ്ങളിൽ കാണാം.
പോലീസും അഗ്നിശമന വിഭാഗവും എത്തിയാണ് തീ അണച്ചത്. റോഡിൽ ഗതാഗതക്കുരുക്കിനും ഇത് വഴിവെച്ചിരുന്നു. തീപിടുത്തത്തിന് കാരണം എന്താണെന്ന് വ്യക്തമായിട്ടില്ല. വാഹനത്തിലെ തകരാറാണോ മറ്റെന്തെങ്കിലും കാരണമാണോ എന്ന് അന്വേഷണത്തിൽ മാത്രമേ വ്യക്തമാകൂ.
സംഭവത്തെക്കുറിച്ച് അന്വേഷിക്കുമെന്ന് ടാറ്റാ മോട്ടോഴ്‌സ് വാർത്താക്കുറിപ്പിൽ വ്യക്തമാക്കി. ഇന്ത്യയിൽ ഏറ്റവും കൂടുതൽ വിറ്റഴിക്കപ്പെടുന്ന ഫോർവീൽ ഇലക്ട്രിക് വാഹനമാണ് ടാറ്റ നെക്‌സൺ. ഇലക്ട്രിക് ഇരുചക്ര വാഹനങ്ങൾക്ക് തീപിടിക്കുന്ന സംഭവങ്ങൾ തുടർച്ചയായി റിപ്പോർട്ട് ചെയ്യപ്പെടാറുണ്ടെങ്കിലും കാറുകൾക്ക് തീപിടിക്കുന്നത് അപൂർവ്വമാണ്. ചൂട് കൂടിയോ മറ്റോ പൊട്ടിത്തെറിക്കുന്ന സാഹചര്യം പരാമവധി ഒഴിവാക്കാനുളള സംവിധാനങ്ങളോട് കൂടിയ ബാറ്ററികളാണ് കാറുകളിൽ ഉപയോഗിക്കുന്നതും.
ടാറ്റയുടെ ഇലക്ട്രിക് വാഹനങ്ങൾ ഉപയോഗിക്കുന്നവരുടെ സുരക്ഷയും കമ്പനിക്ക് പ്രധാനമാണെന്ന് ടാറ്റ മോട്ടോഴ്‌സ് വാർത്താക്കുറിപ്പിൽ വ്യക്തമാക്കി. ഇത് ആദ്യ സംഭവമാണ്. നാല് വർഷമായി 30,000 ത്തിലധികം ഇവികൾ 100 മില്യനിലധികം കിലോമീറ്ററുകൾ രാജ്യത്ത് സഞ്ചരിച്ചുകഴിഞ്ഞുവെന്നും കമ്പനി ചൂണ്ടിക്കാട്ടി.
Comments