ന്യൂഡൽഹി: രാഷ്‌ട്രപതി തിരഞ്ഞെടുപ്പിൽ എൻഡിഎ സ്ഥാനാർത്ഥി ദ്രൗപദി മുർമുവിന് ഔപചാരികമായി പിന്തുണ അഭ്യർത്ഥിച്ച് ബിജെപി ദേശീയ അദ്ധ്യക്ഷൻ ജെ പി നദ്ദ. കോൺഗ്രസ് നേതാക്കളായ മല്ലികാർജ്ജുൻ ഖാർഗെ, അധീർ രഞ്ജൻ ചൗധരി, നാഷണൽ കോൺഫറൻസ് നേതാവ് ഫറൂഖ് അബ്ദുള്ള, ജെഡിഎസ് നേതാവ് എച്ച് ഡി ദേവഗൗഡ തുടങ്ങിയ പ്രതിപക്ഷ പാർട്ടി നേതാക്കളെ ടെലിഫോണിൽ വിളിച്ചാണ് അദ്ദേഹം പിന്തുണ അഭ്യർത്ഥിച്ചത്.
ഇത്തരം തിരഞ്ഞെടുപ്പുകൾ രാഷ്ട്രീയത്തിന് അതീതമായിരിക്കണം. രാഷ്‌ട്രപതി തിരഞ്ഞെടുപ്പിൽ മത്സരം ഒഴിവാക്കാൻ ശ്രമിക്കണമെന്നും നദ്ദ അഭ്യർത്ഥിച്ചു.
അതേസമയം, എൻഡിഎ സഖ്യത്തിന് പുറത്തുള്ള പാർട്ടികൾ വരെ ദ്രൗപദി മുർമുവിന് പിന്തുണ അറിയിച്ചതോടെ, രാഷ്‌ട്രപതി തിരഞ്ഞെടുപ്പിൽ എൻഡിഎ സ്ഥാനാർത്ഥിയുടെ വിജയം ഉറപ്പായി. രാഷ്‌ട്രപതി സ്ഥാനാർത്ഥിയായി ദ്രൗപദി മുർമു ഇന്ന് നാമനിർദ്ദേശ പത്രിക സമർപ്പിച്ചു. പാർലമെന്റിലെത്തി വരണാധികാരിയായ രാജ്യസഭ സെക്രട്ടറി ജനറൽ പി.സി.മോദി മുമ്പാകെയാണ് നാമനിർദ്ദേശ പത്രിക സമർപ്പിച്ചത്. പ്രധാനമന്ത്രി നരേന്ദ്രമോദി, കേന്ദ്രമന്ത്രിമാരായ രാജ്‌നാഥ് സിംഗ്, ആഭ്യന്തരമന്ത്രി അമിത് ഷാ, ബിജെപി ദേശീയ അധ്യക്ഷൻ ജെ.പി.നദ്ദ, എൻഡിഎ കക്ഷി നേതാക്കൾ, മറ്റ് പ്രതിപക്ഷ നേതാക്കൾ തുടങ്ങിയവർ പത്രിക സമർപ്പണത്തിൽ പങ്കെടുത്തു. ജൂലൈ 18നാണ് തിരഞ്ഞെടുപ്പ്.
