ചൈനീസ് ഉത്പന്നങ്ങൾ എന്ന് കേൾക്കുമ്പോഴെ നമ്മൾ മുഖം ചുളിക്കും. ചൈനയുടെ ബാറ്ററികളും ഫോണുകളുമടക്കം ഇലക്ട്രോണിക് ഉത്പന്നം വാങ്ങിച്ച് പണി കിട്ടിയവരായിരിക്കും നമ്മൾ ഭൂരിപക്ഷം പേരും. എന്നാൽ ഇതുവരെ കണ്ടതല്ല ചൈനീസ് ഉത്പന്നം, ഇനി കാണാൻ ഇരിക്കുന്നതാണ് ചൈനയുടെ കിടിലൻ ഉത്പന്നമെന്ന് തെളിയിക്കാൻ ശ്രമിക്കുകയാണ് ഒരു കമ്പനി. ഇലക്ട്രിക് വാഹനങ്ങൾക്കായുള്ള പുതിയ ബാറ്ററിയാണ് ഇവർ നിർമ്മിച്ചിരിക്കുന്നത്. ചൈനയിലെ പ്രമുഖ ഓട്ടോമോട്ടീവ് ലിഥിയം-അയൺ ബാറ്ററി നിർമ്മാതാക്കളായ കണ്ടംപററി ആംപെരെക്സ് ടെക്നോളജി കോ ലിമിറ്റഡാണ് (CATL) തങ്ങളുടെ പുതിയ ബാറ്ററി പരിചയപ്പെടുത്തിയിരിക്കുന്നത്. ഫുൾ ചാർജിൽ ഏകദേശം 1,000 കിലോമീറ്ററിലധികം വാഹനങ്ങൾക്ക് സഞ്ചരിക്കാനുള്ള ഊർജ്ജം നൽകും എന്നാണ് കമ്പനിയുടെ അവകാശ വാദം. CTP (സെൽ-ടു-പാക്ക്) സാങ്കേതികവിദ്യയുടെ മൂന്നാം തലമുറയായ ‘ക്വിലിൻ’എന്ന് വിളിക്കപ്പെടുന്ന CTP 3.0 ബാറ്ററി പാക്കിന് ഏകദേശം 72 ശതമാനം വോളിയം യൂട്ടിലിസ്റ്റൈറ്റൺ കാര്യക്ഷമതയുണ്ടെന്നാണ് കമ്പനി പറയുന്നത്.
ടെർനറി ബാറ്ററി സിസ്റ്റങ്ങൾക്കായി 255 Wh/kg എന്ന ഊർജ സാന്ദ്രതയാണ് ബാറ്ററി പാക്കിൽ ഉള്ളത്. അതിനാൽ CATL പ്രകാരം ലോകത്തിലെ എക്കാലത്തെയും ഉയർന്ന സംയോജന നിലയാണ് ചൈനീസ് കമ്പനി വാഗ്ദാനം ചെയ്യുന്നു. ചൈനീസ് പുരാണത്തിലെ ‘ക്വിലിൻ’ എന്ന ഐതിഹാസിക ജീവിയുടെ പേരാണ് ബാറ്ററിയ്ക്ക് നൽകിയിരിക്കുന്നത്. ക്വിലിൻ ബാറ്ററികൾ വൻതോതിൽ ഉൽപ്പാദിപ്പിക്കുമെന്നും 2023-ൽ വിപണിയിൽ എത്തുകയും ചെയ്യുമെന്ന് കണ്ടംപററി ആംപെരെക്സ് ടെക്നോളജി കോ ലിമിറ്റഡ് പറയുന്നു.
സെല്ലും മൾട്ടിഫങ്ഷണൽ ഇലാസ്റ്റിക് ഇന്റർലേയറും ചേർന്ന സംയോജിത ഊർജ്ജ യൂണിറ്റ് ഈ ഉൽപ്പന്നത്തിന്റെ ദീർഘകാല നിലനിൽപ്പും, ഷോക്ക്, വൈബ്രേഷൻ എന്നിവയ്ക്കുള്ള പ്രതിരോധവും മെച്ചപ്പെടുത്തുന്നു. ബാറ്ററിക്ക് താപ സ്ഥിരതയും സുരക്ഷയും ഉണ്ടെന്നും അതിനാൽ ഉൽപ്പന്ന നവീകരണങ്ങളിൽ ഉയർന്ന ഊർജ്ജ സാന്ദ്രതയുള്ള മെറ്റീരിയലുകളുമായി പൊരുത്തപ്പെടുന്നുവെന്നും ഇവർ പറയുന്നു. സെല്ലിനെ വേഗത്തിൽ തണുപ്പിക്കാൻ കഴിയുകയും താപനില കുറയ്ക്കുകയും ചെയ്യും. അതേസമയം, ഫാസ്റ്റ് മോഡിൽ ചാർജ് ചെയ്യാൻ 10 മിനിറ്റ് മാത്രമേ എടുക്കു എന്നിങ്ങനെയാണ് കമ്പനിയുടെ അവകാശ വാദങ്ങൾ.
Comments