സൂപ്പർ സ്റ്റാർ സുരേഷ് ഗോപിയുടെ പിറന്നാൾ ആഘോഷിച്ച് താര സംഘടനയായ അമ്മ. അമ്മയുടെ വാര്‍ഷിക ജനറല്‍ ബോഡി യോഗം ഇന്ന് കൊച്ചിയില്‍ ചേര്‍ന്നിരുന്നു. ഈ ദിവസം തന്നെയാണ് സുരേഷ് ഗോപിയുടെ 64 ആം പിറന്നാളും. വർഷങ്ങൾക്ക് ശേഷം പിണക്കങ്ങളും പരിഭവങ്ങളും എല്ലാം മറന്ന് അമ്മയിലേയ്‌ക്ക് തിരിച്ചെത്തിയ സുരേഷ് ഗോപിയ്‌ക്ക് സംഘടന നൽകിയ വരവേൽപ്പ് ഏറെ ശ്രദ്ധിക്കപ്പെട്ടിരുന്നു. ഇപ്പോൾ താരത്തിന്റെ പിറന്നാൾ ആഘോഷമാക്കിയിരിക്കുകയാണ് അമ്മ. ഏറെ ശ്രദ്ധിക്കപ്പെട്ടത് താരരാജാക്കന്മാരുടെ ഒത്തു ചേരലാണ്.
മലയാള സിനിമയുടെ ത്രിമൂർത്തികൾ വർഷങ്ങൾക്ക് ശേഷം ഒരുമിച്ച് ഒരാഘോഷം ഇപ്പോഴാണ് സംഭവിച്ചിരിക്കുന്നത്. സുരേഷ് ഗോപിയുടെ പിറന്നാൾ കേക്ക് മുറിച്ചും കൈയടിച്ചും താരരാജാക്കന്മാർ ആഘോഷിച്ചപ്പോൾ ആരാധകർക്ക് ആവേശമായി. പിറന്നാൾ ആശംസകൾ നേർന്ന് മമ്മൂട്ടിയും മോഹൻലാലും സുരേഷ് ഗോപിയ്‌ക്ക് മധുരം വായിൽ നൽകി. മലയാള സിനിമയുടെ സൂപ്പർസ്റ്റാറുകളുടെ സംഗമം സമൂഹമാദ്ധ്യമങ്ങളിൽ വൈറലാവുകയാണ്. തൊണ്ണൂറുകളിലേയ്‌ക്ക് മടങ്ങിപോയ അനുഭൂതിയിലാണ് മലയാള സിനിമ പ്രേമികൾ.
കുടുംബസമേതമാണ് സുരേഷ് ഗോപി യോഗത്തില്‍ പങ്കെടുത്തത്. മലയാള സിനിമയിലെ താരങ്ങൾ സുരേഷ് ഗോപിയ്‌ക്ക് ആശംസകൾ നേർന്ന് രാവിലെ മുതൽ രംഗത്ത് വന്നിരുന്നു. പിറന്നാളിനോടനുബന്ധിച്ച് ആരാധകർക്ക് ആവേശമേകി തന്റെ പുതിയ ചിത്രങ്ങളുടെ പോസ്റ്ററുകൾ സുരേഷ് ഗോപി പങ്കുവെയ്‌ക്കുകയും ചെയ്തു. ജോഷി- സുരേഷ് ഗോപി കൂട്ടുകെട്ടിലുള്ള പാപ്പനാണ് ഉടനെ തിയറ്ററിൽ എത്തുന്ന സുരേഷ് ഗോപി ചിത്രം. ‘സലാം കാശ്‍മീരി’നു ശേഷം ജോഷിയും സുരേഷ് ഗോപിയും ഒന്നിക്കുന്ന ചിത്രത്തില്‍ ‘എബ്രഹാം മാത്യൂസ് പാപ്പന്‍ ഐപിഎസ്’ എന്ന കഥാപാത്രത്തെയാണ് സുരേഷ് ഗോപി അവതരിപ്പിക്കുന്നത്.
Comments