ന്യൂഡൽഹി : കൊറോണ പ്രതിരോധ വാക്സീൻ വിതരണം 200 കോടി ഡോസുകളിലേക്ക് അടുത്തുകൊണ്ടിരിക്കുന്ന സന്തോഷം മൻ കി ബാത്തിലൂടെ പങ്കുവെച്ച് പ്രധാനമന്ത്രി നരേന്ദ്രമോദി. മുൻകരുതൽ ഡോസുകളും അർഹരായ ജനങ്ങൾക്ക് അതിവേഗം വിതരണം ചെയ്യുന്നുണ്ടെന്നും അദ്ദേഹം കൂട്ടിച്ചേർത്തു. പ്രതിമാസ പരിപാടിയായ മൻ കീ ബാത്തിന്റെ 90 ആം എപ്പിസോഡിൽ സംസാരിക്കവേയാണ് അദ്ദേഹം ഇക്കാര്യം വ്യക്തമാക്കിയത്.
‘കൊറോണക്കെതിരെ ജനങ്ങൾ മുൻകരുതൽ സ്വീകരിക്കണം . രാജ്യത്തിൽ വാക്സീൻ ഫലപ്രദമായ മാറ്റം കൊണ്ട് വരുന്നു എന്നത് സംതൃപ്തി നൽകുന്ന കാര്യമാണ്. 200 കോടി വാക്സീൻ ഡോസ് വിതരണത്തിലേക്ക് ഇന്ത്യ എത്തുന്നു.മുൻകരുതൽ ഡോസും രാജ്യത്ത് അതിവേഗം നൽകുന്നുണ്ട്. രണ്ടാം ഡോസ് സ്വീകരിച്ചതിന് ശേഷം സമയം എത്തിയാൽ ഉടൻ മൂന്നാം ഡോസ് വാക്സീൻ സ്വീകരിക്കണം . കുടുംബത്തിലെ പ്രായമായവർ ഉൾപ്പെടെ മൂന്നാം ഡോസ് സ്വീകരിക്കണം ‘ പ്രധാനമന്ത്രി പരിപാടിയിൽ പറഞ്ഞു.
കൂടുതൽ വാക്സിനുകളുടെ ലഭ്യത, സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും വാക്സീൻ ലഭ്യമാക്കൽ ,വാക്സിൻ വിതരണ ശൃംഖല കാര്യക്ഷമമാക്കൽ തുടങ്ങിയവ ഈ നേട്ടത്തിന്റെ പ്രധാന ഭാഗമാണ്. കൂടാതെ സംസ്ഥാനങ്ങളെയും കേന്ദ്രഭരണ പ്രദേശങ്ങൾക്കും ഇന്ത്യാ ഗവൺമെന്റ സൗജന്യ വാക്സീനുകൾ നൽകി സഹായിക്കുന്നുണ്ടെന്നും അദ്ദേഹം വ്യക്തമാക്കി.
ഇവയ്ക്ക് പുറമെ മാസ്ക് , സാനിറ്റൈസർ എന്നിവയുടെ ഉപയോഗം വൈറസിനെതിരെയുള്ള മുൻ കരുതലാണ് . അവ കൃത്യമായി പാലിക്കാനും രോഗത്തിനെതിരെ ജാഗരൂകരായിരിക്കാനും ജനങ്ങളോട് അദ്ദേഹം അഭ്യർത്ഥിച്ചു. കൂടാതെ മൺസൂൺ സീസണിൽ രോഗങ്ങൾക്കെതിരെ ജാഗ്രത പാലിക്കാനും നിർദ്ദേശം നൽകി.
Comments